秋天又到了，係時候煲湯滋潤一下。
材料：
粟米 2條 (切段)
紅蘿蔔 1條 (去皮切件)
鮮淮山 1支 (去皮切件)
無花果 3-4粒
豬骨 2-3條 (洗淨切大件)
調味：
鹽 適量
做法：
1. 所有材料洗淨、切件
2. 豬骨出水
3. 所有材料下鍋，加入約2-3公升水，水滾後轉小火煲2.5-3小時。關火調味即成。
心得：
1. 刨鮮淮山一定一定要戴手套，因為鮮淮山的汁液會令到手部痕癢
2. 今次我係用一字骨。用豬展或者豬尾骨等等都可以。
3. 如果係用電湯煲，所有材料直接凍水落鍋煲3.5小時就可以。
其實諗到煲呢個湯，係因為我有一次買外賣原隻豬手有跟埋原條豬手骨比我XD 因為唔想浪費，所以就諗吓除咗煲粥之外仲可以點樣利用條豬手骨，於是就去搵煲湯食譜了。不過如果係用街外買果D一隻隻即食豬手嘅豬手骨的話，煲湯之前一定要先飛水或者用熱水沖一沖，一來洗走D油二來亦都可以洗走D黑椒同鹽份。
講起煲湯，而家買肉煲湯真係好鬼貴，尤其係自從前年有豬瘟之後，而家食新鮮豬同食新鮮牛價錢真係差唔多！試過一次去supermarket買新鮮豬展，手掌咁大件就差唔多$100，真係貴到冇朋友！所以而家煲湯，有時都係去買冰鮮豬就算，價錢平一半而且飲唔到有咩分別！不過豬肉咁貴都唔係辦法，我諗下次可能要試下用雪藏牛展先得，價錢可能隨時平過食冰鮮豬啊！
另外要介紹下，自從上次搬屋整爛咗個煲湯電煲之後，最後又係忍唔住要買返個煲湯電煲！點解要買電煲呢？最主要就係因為用電，唔駛睇火！另外就算我屋企本身已經係用電磁爐煮食，但係有一個獨立煲湯電煲，可以唔佔爐頭 (煲一次老火湯3-4小時冇走雞) 又可調校時間，比起直接用電磁爐更加方便。仲有，用電煲煲完湯佢會自動保溫，呢個係就算用明火或者電磁爐都做唔到，對於上班一族，放工返到屋企就可以即刻飲到一碗暖湯，真係正到爆。當然，煲湯電煲 (不論咩牌子) 除咗煲湯之外，仲可以滾湯炆肉燉補品……諸如此類啦！
至於你問電煲同明火煲湯有冇分別？其實我飲唔出有咩分別喎XDDDD 不過有一樣嘢我真係堅持嘅，就係電煲內膽我會揀陶瓷內膽，感覺上會同舊式瓦煲煲湯差唔多，同埋有時真係要煮酸嘢 (例如煲醋)，用金屬煲真係唔得吖嘛。
