媽媽代工系列: 功課花之二

上次講過，而家都唔知係邊個返學、邊個做功課。繼上次年花之後，另一個連公公婆婆都要出手幫忙嘅功課就係——康文署一人一花計劃！

都唔知邊個白痴諗出嚟，要人晌冬天嚟種花，仲要今年嘅花係「新畿內亞鳳仙花」。首先，小學生都知，春天播種、夏天耕種、秋天收成、冬天過冬，邊有人會揀冬天呢D又乾又凍嘅日子嚟種花苗？當然，你可以話香港冬天都唔係好凍 (雖然今年立春之後先反常地低至五六七度)，其實都唔會太難種植，但，唔好話去睇wiki，連康文署自己份powerpoint都寫明「植株適宜在溫度20°C-27°C的環境下生長」，我真係諗唔到香港嘅冬天有幾何有20°C以上囉！

溫度都唔緊要，因為屋企都仲可以開暖爐，但種鳳仙花另一個要求係「須日照充足及適當的温度」！日照？我媽同我屋企都向西北，夏天就話會西斜四點曬到七點啫，冬天去邊度搵西斜？所以最後，學校派果棵苗一個月左右就死咗喇orz

棵苗都死咗，咁去邊度搵功課交？雖然老師話唔一定要交，但係作為一個唔想仔女有欠交功課記錄嘅媽媽嚟講，梗係想幫子女盡量完成功課啦 (講到呢度，我先記得我個仔得3歲咋！點解3歲就要學種花？！)，唯有叫晌屋企做管家嘅公公去買過棵苗啦！功課花果然名不虛傳，因為花墟D舖頭真係寫住「功課花 / 交功課」而唔係「新畿內亞鳳仙花」，吹脹！睇嚟根本就預咗好多人都會種死！

買番棵九成似嘅花，之後梗係要小心種啦！今次就由晌屋企做管家嘅公公日日拎棵花落街曬太陽，真係出心又出力，唔該哂！然後日子一日一日咁過，到最後要交功課嘅日子……當然唔係淨係交番棵花返學校咁簡單啦，仲要做報告呀！嗱，講到呢度，我又記起我個仔得3歲咋，真正嘅字都唔識多隻，你叫佢做report？呢D時候咪又係做阿媽嘅出手囉！！

好彩我都做慣功課 (多得top up degree course，每科都要做一份三千字essay / report，仲要係英文！)，幫小朋友做report，只要求其key D可愛公仔，print幾張相，打幾隻字 (仲可以揀font 20)，做埋個封面就搞掂，連summary、content、conclusion、recommendation……都唔駛，真正小學雞程度，冇難度！最重要反而係要去買個有骨folder入起份report，因為屋企冇打窿機XD

你話丫，搞到咁大，呢份功課點止係媽媽代工丫，直頭係全家總動員呀！