糖醋豬軟骨

話說，之前老公幫趁聽開果個網台買咗兩支酒，返嚟果陣唔知點解又拎多咗兩包日式豬軟骨返嚟。因為唔諗住放雪櫃，所以好快就比我開咗嚟食。食完之後，覺得人哋一包豬軟骨得果5、6件，我開哂兩pack都唔夠我一餐餸 (屋企個小朋友已經變咗大大隻食肉獸Orz)，於是就上網睇吓豬軟骨究竟難唔難整得淋同好食。整過幾次之後，終於比我整出一個懶人版煮法，連爆鑊都唔駛～

材料︰

豬軟骨　　　　　　　　約2磅

薑　　　　　　　　　　約6-7片

蒜頭　　　　　　　　　2-3粒 (切碎)

蔥頭　　　　　　　　　3-4瓣 (可切碎)

調味：

生抽　　　　　　　　　1份 (約30ml)

味醂　　　　　　　　　1份 (約30ml)

鎮江醋　　　　　　　　2份 (約60ml)

白醋　　　　　　　　　約5ml

冰糖　　　　　　　　　1-2粒 (視乎個人口味)

水　　　　　　　　　　2-3份 (約60-100ml，視乎鍋的大小)

做法：

1. 豬軟骨出水、再切件

2. 所有材料、調味料下鍋，水一定要蓋過食材。大火煮滾，水滾後轉小火炆20分鐘、關火焗20分鐘。重覆再炆20分鐘、焗20分鐘，即成。

心得：

1. 我買的是原絛未切豬軟骨，所以原條出水之後先切小件。試過買已經切件的豬軟骨但效果太差，一來肉類出水之後會縮水、二來再炆完之後再縮更細，老公投訴太碎唔好食～

2. 圖中見我用的是壽司醋，因為我要清食材而已哈哈。壽司醋的份量可以跟鎮江醋兌換，但最好不要超過一半。其實我亦有試過用紅酒 (煮紅酒炆牛肋條剩下的)，同樣，只要跟鎮江醋的份量兌換就OK了

3. 煮酸性食物，如果容量OK的話我都會用瓦煲整，一來始終金屬同酸性食物會有化學反應 (零可信其有啦～)，另外就是，瓦煲關火之後仍然會長時間保持溫度，做到焗軟肉類的效果

4. 糖的份量比較隨意，主要是看個人口味。這個餸應該是帶甜味的，而且冰糖亦有軟化肉類的效果，所以如果想吃得「心安理得」一些的就放一小粒冰糖吧～

5. 最重要一點，加白醋的原因，除了豐富醋酸的味道以外，就是因為白醋會帶出肉的油脂！所以這個豬軟骨炆完之後會有大量油脂浮面 (這次有撇出來的應該有30ml以上了)，記緊一定要先撇掉那層極邪惡的油脂才上菜喔！如果要打獻收汁的話，也一定要先撇油、再加生粉水收汁～

整呢個餸真係完全唔難同唔花時間，最麻煩嘅都只係出水同切食材哈哈。我通常都係weekend食lunch果陣就準備好所有嘢，之後落街買餸前炆第一轉 (用電磁電陶爐自帶timer自動關火)，買完餸返到屋企再炆第二轉。如果係整嚟隔日食嘅，就會煮好之後pack盒入雪櫃；如果係即晚食，就會開飯前再翻熱。

其實我有次出街食飯見過咸味豬軟骨，仲有點嚟食，不過食完感覺唔OK，因為佢跟果個白蘿蔔完全唔入味。我有同老公講話不如我又試吓整咸味豬軟骨，但係老公話豬軟骨咸味唔啱味喎，睇嚟我要上網搵多D食譜參考吓先得～

新電子燉盅 (feat. 炆牛𦟌)

我屋企個一人份電子燉盅，經過咗10年嘅摧殘之後，佢個脆弱嘅機身 (其實只係一個膠殼) 終於頂唔住裂咗再解體埋。當年$200有找嘅貨仔，用咗10年，仲想點丫。雖然早兩年屋企買咗個電湯煲 (個煲本身都有燉煮function)，但係跟機個燉盅size又大得滯，而且個電湯煲勁好火力，煲親嘢都勁多水蒸氣蒸到個抽油煙機滴哂水。思前想後，啱啱遇著網店平台大特價，趁平唔駛$300兼vipday再95折，乘機換個新嘅電子燉盅 (一機跟一大兩小燉盅) 啦～

為咗試新機，一早就準備好簡單嘅燉湯材料 (四神湯+一字排骨)，一收貨就即刻燉個靚湯做晚餐。開飯果陣，老公好自然咁走去夾煲湯豬肉 (一字排骨) 食。個仔見到點解佢爸爸有得食而佢冇得食，於是就……

仔︰咩嚟架 (指住D骨)？

我︰(食緊飯) 排骨。

仔︰咩話？「鞋」骨？

我︰「排」骨呀。

仔︰「鞋」骨 (疑惑中)？？？

老公︰係呀，你睇吓 (指住個燉盅) ，似唔係果D裝住D骨果D盅呀，呢D (再指住食完冇肉嘅骨)咪裡面D「骸骨」囉！啊，裝骨果D應該叫金塔先啱……

我︰(怒bear我老公) 我真係叫你阿媽掌吓你個嘴先得……

---------------我係分界線---------------

既然買得個新機，就梗係趁仲有3分鐘熱度嘅時候 (其實係7日內有問題可以退貨) 試盡佢啦！於是食完飯，我又準備定第二日嘅晚餐。因為第二日要返工，所以可以試埋時間制。

p.s. 以前舊機好簡單，只有開機關機兩個制，所以我要另外自備timer做預訂煮食時間。而家預約時間功能已經係必然，仲加多好多咩快燉慢燉蒸煮糖水燕窩諸如此類嘅function (其實就係操作時間唔同而已)，不過真係真心user friendly嘅～

炆牛𦟌 (電子燉盅版 / 燉盅2.5L容量)

材料：

牛𦟌　　　　　　　1條 (切件)

甘筍　　　　　　　3-4條 (或有泥紅蘿蔔1條)

蕃茄　　　　　　　3-4個 (切4件)

洋蔥　　　　　　　1個 (小，切大件)

調味：

鹽　　　　　　　　適量

月桂葉　　　　　　2片

做法：

1. 牛𦟌切大件、出水。 2. 甘筍、洋蔥去皮，切件。蕃茄切件。 3. 將所有材料放入燉盅，再放月桂葉、鹽，然後加適量凍滾水 (最多8成滿)。
	4. 燉盅機身按機身指示注入適量清水，開機，設定好時間制及燉湯功能。
5. 放工等開飯～

心得︰

1. 因為我炆親牛肉都會順便當煲牛肉湯，所以如果想有啖湯飲吓，鹽就唔好落咁多。

2. 燉嘅好處係食材唔會滾到爛哂，連D蕃茄都仲係一舊舊可以夾得返嚟食～

3. 呢個炆牛𦟌我有做過明火炆煮版本，主要就係多一個步驟，將甘筍、蕃茄、洋蔥都炒香，然後就好似平時炆牛腩咁樣明火15分鐘、焗15分鐘、再明火、焗煮至2小時 (牛𦟌炆淋) 為止。

最後補圖

老公︰呢個 (指住碟炆牛𦟌) 又係用果個金塔煮架？

麻辣雞煲

話說，我老公好鍾意食雞，除咗上校炸雞唔食之外，屋企家常嘅冬菇蒸雞、金針雲耳蒸雞、粟子炆雞、白切雞、酒樓炸子雞、豉油雞、茶記雞煲、辣子炸雞、蔥油雞、海南雞……真係講得出佢都食。尤其係疫情之前，個個星期返奶奶屋企，夜晚出親街食飯，老爺一定會叫半隻雞，因為佢個仔即係我老公鍾意食雞！我成日講笑話佢前世一定係用雞有仇，如果唔係今世又點會餐餐都食雞哈哈哈。

又話說，因為而家疫情，我哋唔止少咗出街，連外賣都食少咗。鬼咩，就算住晌大型商場上蓋，餐餐叫唔同舖叫足7 日14餐唔重覆，食得多都厭啦。而且食外賣多數都係肉多菜少油淋淋，想食得健康D，就唯有自己煮！咁啱，阿仔而家逢星期六朝早都要補習，咁晌等佢放學果一個鐘，除咗去食早餐 (以前係堂食，而家唔得添喇)，就係去supermarket買餸喇。又咁啱，supermarket每朝都有切好件嘅雞，唔駛$40就有半隻，同埋而家市面出咗好多辣雞煲醬料，咁就比個challenge自己啦~

材料：

雞　　　　　　　　半隻 (切件)

薑　　　　　　　　5-6片

蒜頭　　　　　　　6-8大瓣 (或獨子蒜3粒)

紅蔥頭　　　　　　2-3粒

洋蔥　　　　　　　半個 (切片)

調味：

鹽　　　　　　　　適量

辣雞煲醬　　　　　4大湯匙

1.      雞件洗淨，用少少鹽 (約半茶匙) 醃最少半小時。 2. 薑、蒜、蔥等等洗淨、切好。
	3. 雞件先煎香 (至7-8成熟，不見血就好)，盛起備用。
4. 不用洗鑊，用剛才的雞油，將料頭 (薑蔥蒜) 爆香。
	5. 落辣雞煲醬，炒香。
6. 落雞件，兜勻。
	7. 同時間，隔離準備一個砂煲。開火預熱。
8. 快手將鑊內所有材料倒入已預熱的砂煲內。闔蓋關火，焗10分鐘。
	完成，食得！

心得︰

1. 料頭唔怕多只怕少，其實今次已經落得輕手咗，如果想惹味D可以落多D薑蔥蒜。

2. 我個砂煲印象中係1L定係1.3L，半隻雞啱啱好 (因為我試過一隻雞係放唔哂哈哈)。我呢個砂煲唔太適合直接爆炒，加上我係用電磁+電陶雙爐頭，所以一般都係煮到8成，同時預熱定個砂煲用嚟收尾 (用餘溫焗熟)。

3. 如果食得辣，可以落多D醬料。又如果一煲兩食，煮果陣可以落多少少醬，食完D雞，加水就可以直接打邊爐了。

市面上雞煲醬種類愈出愈多，麻辣秘制惡魔地獄爺嫲爹娘……我自己試咗幾款之後，最後反而揀咗隻唔係叫「雞煲醬」嘅醬 (叫點煮醬，同牌子有雞煲醬但係唔啱我同老公口味)，就係貪佢麻辣味突出D。另外，現成醬料呢家嘢真係好個人，我屋企揀醬料首要係冇蠶豆成份 (因為屋企有蠶豆仔)，所有有豆板醬 (多數都用蠶豆做) 成份嘅醬料或者牌子基本上係唔會晌我屋企出現。如果屋企有蠶豆仔嘅話，買醬料之前記得睇清楚食物標籤先好買啊。

直髮夾一物多用之封袋機

話說好耐之前貪得意去$12店買咗個食物封袋機返屋企，點知原來一D都唔好用！因為佢封袋口嘅原理係用發熱線加熱，但係試問用兩粒2A電又點夠力丫，結果就係等佢發熱又要等好耐，但係封口效果又唔好 (因為只係得一條好幼嘅線)。

後來有一日望到屋企有個好耐都冇用嘅迷你直髮夾……靈機一觸，用直髮夾，加張焗爐紙咪快靚正囉！簡直perfect池XD

蒜蓉 (懶人版)

疫情維持咗差唔多兩年，晌屋企煮飯嘅日子由以前一星期兩晚，變成一星期最少煮五晚。煮餸用醬料多如天上繁星，但係最基本除了豉油、糖、鹽之外，我最常用的應該就係蒜蓉了，尤其係炒白菜、炒菜芯、炒生菜、炒通菜、炒芽菜、甚至係炒苦瓜、醃青瓜、以及最近大熱嘅辣雞煲……真係數得出嘅都會用到蒜蓉。

既然咁常用到，如果每日煮晚餐都要剁一次就梗係麻煩啦，所以我雪櫃長期都會有一樽蒜蓉晌度。試過偷懶，用買返嚟嘅李X記，又冇蒜味，起鑊又彈到周圍都係 (因為有水)。所以都係唔懶得，唯有keep住自己剁蒜蓉。

我呢個自家懶人版蒜蓉，只得蒜蓉同油，所以只可以煮飯用。如果係拌麵用嘅有調味蒜蓉醬，等我有機會再試做哈哈。

另外就係，以下有方便快捷、又唔會整到成手都係味的剝蒜頭方法，真係一定要試！

材料︰

蒜頭　　2-3顆 (不是瓣喔)

做法：

	蒜頭撕開一瓣瓣。
把蒜瓣的底部切去。
	準備一個大碗或者高身樽 (重點係要有蓋的)。 將所有切好的蒜瓣放入大碗中。蒜頭只能佔最多1/3空間。
蓋上蓋子，然後用力搖……大概每搖30次就可以打開蓋睇一睇，蒜皮會開始自動脫落。 將已脫皮的蒜瓣挑出，未脫皮的留下，蓋上蓋子繼續搖……
	呢個係我媽介紹我用的剁碎用神器。將脫好皮嘅蒜瓣放入，然後拉幾下……蒜頭馬上變蒜蓉。真係乾手淨腳，又唔會剁到成手都係蒜味！
同時，準備一個已經消毒嘅樽。 我嘅懶人消毒方法係注入剛煲滾嘅熱水，再泡5分鐘，所以最好用玻璃樽。 講起玻璃樽，最好就係手邊有用完嘅醬料樽或者果醬樽，咁就唔駛特登去買啦！
	將食用油注入已消毒嘅樽 (約1/3滿)，再慢慢放加入蒜蓉、再拌勻。緊記蒜蓉一定要有油包裹，如果唔係會容易沾到空氣，既保持唔到香味，又會容易變壞。 唔夠油就一定要一邊加油一邊加蒜！
另外，記得唔好裝到100%滿，80-90%就好喇。我試過裝太滿，之後第二日成個雪櫃都係油！因為蒜蓉之間有小bubble會走返出嚟，就迫埋D油出嚟orz 我今次用咗2隻半蒜頭，剛剛好裝滿一個果醬樽！如果係李X記果D醬料樽，大概係裝到2隻蒜頭份量。

心得：

1. 蒜瓣、蒜蓉一定唔可以沾到水，如果唔係放耐咗好易起青色，咁就唔好食架喇。

2. 如果切蒜瓣果陣見到蒜芯已經起綠色，我都會切走綠色部分，費事放耐咗成樽蒜蓉變哂綠色。所以最好都係去街市買蒜頭，街市多數都新鮮D唔會好似超市咁放咗好耐吽到起芽。

3. 因為我用蒜蓉都算快，所以大概2-3個星期左右就做一次。以我過去經驗，只要冇濕水同埋有keep住有油蓋過蒜蓉，放一個月都冇大問題。

DIY豆漿（豆漿機）

之前提過，最近都會晌屋企沖咖啡。早幾個月前興起400次咖啡打卡果陣，我曾經晌$12店買過電動打泡器用嚟打奶泡整cappuccino同打400次，跟住成日都會去supermarket買屋仔奶返嚟整。之但係其實飲奶飲得多真係好鬼肥﹝低脂奶打唔起奶泡﹞，所以後來又改成買豆漿沖咖啡了。

咁啱阿仔最近又鐘意同我爭飲豆漿，再加上新鮮豆漿存放時間唔長﹝試過放雪櫃一日就變壞了﹞，所以考慮咗一陣，決定平平哋買部豆漿機返屋企DIY。

以前細個果陣，見阿媽整豆漿，要先浸一晚黃豆，之後要用攪拌機、將浸好嘅黃豆加水磨豆漿，再之後要煲一個鐘，仲要記得睇火唔好煲瀉同煲燶喎，之後煲完仲要用個煲湯袋隔渣……真係整過一次就會覺得又麻煩又唔值﹝落街買一支豆漿都係10元8塊之嘛﹞。不過近年已經出咗好多又方便又輕巧嘅一二人份量豆漿機，當然除咗整豆漿，仲可以整其他乜乜露乜乜糊諸如此類啦！

入手之後，馬上開機試試先～

p.s. 非打手，所以牌子都會遮一遮XD

	機身正面。SIZE適中，比我個1L電水煲細少少
同其他版子一樣，有3個MODE可以選擇，另外再加預定時間功能。
	有倒水口。另外頂蓋仲有疏氣位，唔會咁易谷到煲瀉。
內膽有條水位線，不過佢刻得唔清楚所以加水果陣要小心。用量杯加清水大概可以加350mL，但係建議落少DD水﹝要扣返D豆嘅份量﹞，因為我第一煲煲完發覺有幾滴滴咗晌機背，唔知係我冇整好個蓋定係整完開蓋果陣滴濕咗XD
	開始整喇。 一定要用跟機隻匙羹一平羹去製作，如果唔係會打唔郁或者打得唔夠幼細！一平羹黃豆大概16-17g左右。
第一機，冇浸豆，直接量完、洗一洗、加好水就開始整喇。記得個機蓋要關好同對準個握位﹝機頂三角型符號﹞，如果唔係部機會停咗唔郁架。
	部機整豆漿比想像中細聲，仲細過平時用blender打果汁，而且每次都係打15秒左右，睇住電視根本唔知佢打咗幾多次哈哈～ p.s. 反而洗機mode就好似平時用blender咁上下嘈XD 製作打豆漿過程中，部機亦都唔會好震，放晌枱面冇郁嚟郁去，安全！ 開機等30分鐘就飲得XD
整完，洗機，倒少少清水落去，用洗機mode，2分鐘就得。不過怕污糟﹝其實係怕惹到小強﹞嘅我，當然仲會加多個刷洗乾淨D啦！好彩佢跟機有個刷仔，仲要係3面刷頭可以刷埋刀片下面D罅位，咁就真係乾淨哂喇！

成品嚟講算非常OK，因為我用乾豆冇預先浸，整完倒落隻大杯到，放涼飲只係飲到底部有少少豆渣，如果要完全冇渣，搵張咖啡濾紙隔一隔應該就OK喇。

不過17g豆配350mL水似乎稀身咗DD，下次可以落250mL水，應該會濃好多。

好，搵日試下落D奇怪嘢落去，睇吓可唔可以整到其他口味糖水或者整熱湯之類先XDDDD

粟米紅蘿蔔鮮淮山煲豬骨湯

秋天又到了，係時候煲湯滋潤一下。

材料：

粟米　　　　　　　　　2條 (切段)

紅蘿蔔　　　　　　　　1條 (去皮切件)

鮮淮山　　　　　　　　1支 (去皮切件)

無花果　　　　　　　　3-4粒

豬骨　　　　　　　　　2-3條 (洗淨切大件)

調味：

鹽　　　　　　　　　　適量

做法：

1. 所有材料洗淨、切件

2. 豬骨出水

3. 所有材料下鍋，加入約2-3公升水，水滾後轉小火煲2.5-3小時。關火調味即成。

心得：

1. 刨鮮淮山一定一定要戴手套，因為鮮淮山的汁液會令到手部痕癢

2. 今次我係用一字骨。用豬展或者豬尾骨等等都可以。

3. 如果係用電湯煲，所有材料直接凍水落鍋煲3.5小時就可以。

其實諗到煲呢個湯，係因為我有一次買外賣原隻豬手有跟埋原條豬手骨比我XD 因為唔想浪費，所以就諗吓除咗煲粥之外仲可以點樣利用條豬手骨，於是就去搵煲湯食譜了。不過如果係用街外買果D一隻隻即食豬手嘅豬手骨的話，煲湯之前一定要先飛水或者用熱水沖一沖，一來洗走D油二來亦都可以洗走D黑椒同鹽份。

講起煲湯，而家買肉煲湯真係好鬼貴，尤其係自從前年有豬瘟之後，而家食新鮮豬同食新鮮牛價錢真係差唔多！試過一次去supermarket買新鮮豬展，手掌咁大件就差唔多$100，真係貴到冇朋友！所以而家煲湯，有時都係去買冰鮮豬就算，價錢平一半而且飲唔到有咩分別！不過豬肉咁貴都唔係辦法，我諗下次可能要試下用雪藏牛展先得，價錢可能隨時平過食冰鮮豬啊！

另外要介紹下，自從上次搬屋整爛咗個煲湯電煲之後，最後又係忍唔住要買返個煲湯電煲！點解要買電煲呢？最主要就係因為用電，唔駛睇火！另外就算我屋企本身已經係用電磁爐煮食，但係有一個獨立煲湯電煲，可以唔佔爐頭 (煲一次老火湯3-4小時冇走雞) 又可調校時間，比起直接用電磁爐更加方便。仲有，用電煲煲完湯佢會自動保溫，呢個係就算用明火或者電磁爐都做唔到，對於上班一族，放工返到屋企就可以即刻飲到一碗暖湯，真係正到爆。當然，煲湯電煲 (不論咩牌子) 除咗煲湯之外，仲可以滾湯炆肉燉補品……諸如此類啦！

至於你問電煲同明火煲湯有冇分別？其實我飲唔出有咩分別喎XDDDD 不過有一樣嘢我真係堅持嘅，就係電煲內膽我會揀陶瓷內膽，感覺上會同舊式瓦煲煲湯差唔多，同埋有時真係要煮酸嘢 (例如煲醋)，用金屬煲真係唔得吖嘛。

韓式炆豬肉

之前上網見到呢個食譜，覺得好得意亦都好容易做，又係懶人都可以整得到嘅餸，最啱就係早一日整定，然後第二日放工翻熱嚟食。當然整完即刻食一樣冇問題啦～

材料：

豬五花腩　　　　　　　1條

洋蔥　　　　　　　　　1個

蒜頭　　　　　　　　　1整個 (或用獨子蒜3-4個)

京蔥　　　　　　　　　1顆

薑　　　　　　　　　　3-4片

齋啡 (無糖黑咖啡)　　　1杯 (如用咖啡粉請先用熱水沖泡好)

韓式大醬　　　　　　　1-2湯匙 (視乎水量)

水　　　　　　　　　　1升 (或蓋過所有食材)

調味：

鹽　　　　　　　　　　適量

做法：

1. 洋蔥、蒜頭不用去皮，洗乾淨直接對半切開。薑洗乾淨連皮切片。京蔥洗乾淨，去根部，再切成數段

2. 豬五花腩洗乾淨，出水 (最懶版本可以不出水)

3. 所有材料凍水下鍋

4. 大火煮沸後，先把浮游物撈走 (如豬肉有先出水，可略過這步驟)，再以中小火炆煮20分鐘，試味，加鹽，關火，再焗約15分鐘

5. 撈起豬五花腩切件上碟

心得：

1. 咖啡可以用即沖咖啡粉，亦可以用滴漏咖啡，只要係無糖無奶就可以

2. 韓式大醬好容易溶晌水，不一定要用篩隔渣嚟攪開

3. 想豬五花腩易切D，可以先雪凍再切
4. 如果係隔夜食，可以留少少湯汁，第二日再翻蒸或翻叮
5. 如果翻叮就要小心，因為肥肉好容易叮到爆炸XDDDDDD

之前因為輪home office，所以返公司果日就會忙到有開工冇收工。加上小朋友而家晌屋企上zoom變咗又會跟返我哋食飯，如果唔想日日食外賣，就唯有整定D快靚正嘅餸，務求返到屋企一個鐘就可以開飯～

冷萃咖啡 Cold brew coffee (懶人版)

舊年病完之後，一路都有睇吓究竟食D咩會對身體好D，然後發覺每日飲咖啡，好似會對身體有幫助，於是就開始自己買豆同買咗個手動磨豆器返屋企自己沖咖啡。不過因為手動磨豆又搞到自己個膊頭痛、加上想飲凍咖啡又要沖又要雪凍太麻煩，於是又開始搵D簡單懶人版嘅沖泡方法，直到最後晌超級市場見到而家新興起嘅Cold brew coffee。

上網搵咗D資料睇，Cold brew就即冷萃，同平時見到嘅滴漏或者冰滴唔同，最簡單只需要兩個茶葉袋仔就可以做到，實在係太太太適合我呢D懶人了XDDDDD

材料：

咖啡豆　　　　　　　　　　　45-50克 (3咖啡勺)

茶葉袋　　　　　　　　　　　2個

白開水 (室溫)　　　　　　　　500毫升

做法：

1. 咖啡豆磨成粉 (中粗粉粒就可以，不需要磨成幼粉末)

2. 放入茶葉袋

3. 放入乾淨的水瓶中，加入約500毫升水

4. 放入雪櫃，浸泡12-24小時，即成

心得：

1. 咖啡粉磨太幼細，會從茶葉袋走出來，到時要再用濾紙再過濾，反而浪費時間。而且愈細的粉，萃取的咖啡因會愈多

2. 入兩個茶葉袋，是因為咖啡粉會從袋口漏出來。入第一個茶葉袋之後，再套另一個茶葉袋，咖啡粉就不容易從袋口漏出

p.s. 我呢個係「不專業版」，又名「懶人版」，如果對咖啡有要求的，請繞道而行，感謝～

為了晌屋企泡咖啡，我原本有諗過再買一個咖啡豆研磨機，但後來晌電器舖同上網睇咗一輪之後，發覺原來屋企櫃底有個n年前唔知係阿媽定奶奶比我嘅攪拌機，一樣有個磨豆專用嘅刀頭！哈哈哈！估唔到10年後嘅今日，佢終於可以重見天日了XDDDDD

Cold brew咖啡冇熱水沖泡嘅酸味，而且晌夏天，打開個雪櫃就即刻可以飲，簡直啱哂我呢種懶人～

滴膠點滴記

話說早一段時間，我個FB經常出現一D製作滴膠飾物嘅PO（p.s. FB真係真係真係會留意你平時嘅睇PO取向，同埋你日常睇過邊D網頁，再幫你推介某類型嘅PO嘅），然後由於疫情關係只可以留晌屋企唔可以出街，於是就把心一橫，東走走西逛逛，敗咗一堆材料用具矽膠模返屋企試吓玩。

原本有淘咗一個《星空球套餐》返嚟，貪佢有齊哂所有basic材料、用具、矽膠模、decoration、UV手電筒，不過我嘅功力都仲係太太太差了，所以都係等我有整到一個可以見得人嘅製成品先拎出嚟獻醜XD

然後，尋日終於整到一個似樣少少嘅鎖匙扣，yeah！

 

左︰有80分嘅成功作品。
中 & 右︰得50分嘅作品。



睇埋個close up 就知道點解得50分。因為第一次做果陣唔識點封口，所以左修右補整到一舊舊好似腫瘤咁Orz！其實相機映唔到咋，件嘢仲有好多好多手指模……

玩滴膠真係絕對可以訓練耐性，因為玩AB膠要A溝B，溝完、調好色、落模，要等24小時先乾；玩UV膠以為會快D咩？其實一樣要照10分鐘先乾透！之前第一次整唔知，以為照30秒唔滴就OK，點知拎上手……成件半成品即刻黐滿手指模OMG……

p.s. 最近寫另一個blog寫慣咗書面語，搞到寫呢篇文果陣幾乎用咗書面語……寫到一半先發覺「咦？仲乜事個心係諗緊『太遜』唔係『太屎』架！」哈哈哈～

過年三寶

不經不覺又一年，話咁快又到年廿八。因為今年年三十都仲要返工，放工又要趕住湊仔去奶奶屋企團年，所以唯有請阿媽幫手準備部份過年用品，再自己放工去買賀禮。

過年三寶︰碌柚葉水、生果 (柚柑又柚吉，阿媽仲要特登買多對慈菇)、金莎

當然唔少得拜年必備嘅賀禮啦！

又來小學雞笑話一則

鳴謝婆婆提供笑話~

(阿仔份數學功課)

試比較一下，紅色、藍色、綠色顏色筆，哪一支最長？

天真嘅小朋友，竟然走去拎書包盒木顏色出嚟，搵紅、藍、綠色三支筆出嚟度 orz

仔呀仔，你睇哂條題目未架？人哋本書右邊幅圖有比提示架！(紅色比藍色長、藍色比綠色長)

期中考試之迫娘為虎

唔覺唔覺阿仔已經開咗學差唔多三個月，渡過咗9月嘅蜜月期（成日冇帶書冇帶功課、抄錯手冊、拎錯同學仔嘅嘢返屋企……）、10月嘅適應期（默書、小測），終於嚟到11月嘅期中考試。

唉，都唔知係咪學校要決心洗甩「多功課」嘅污名，定係而家已經唔再興抄書，叫個仔溫書抄課文抄詞語仲慘過叫佢去死……因為學校都冇乜要抄寫嘅功課！另一方面，阿仔又出咗名心急兼懶散，所以叫佢抄書就一定要講數講數再講數……字已經寫得樣衰，仲要hea抄，再加上老公把衰口話而家唔駛識寫字（真係想打爆佢個咀），搞到個仔成日都唔肯同我寫字！！

好啦，冇心溫書加上個腦死實實唔試轉彎，都預咗考得唔荒好架啦。派卷返嚟……中文、英文、常識都比老師扣錯字分，所謂嘅錯字咪就係D字樣衰比人扣分囉（個大階寫得唔夠大似細階、個逗號粒豆豉冇寫好，似多條尾嘅句號……），你話火唔火丫！

中、英文卷一考得唔好我預咗（事實都只係得82同78分），但係，中文listening肥佬返嚟……

唉，小一就已經肥佬，我真係接受唔到囉……

都唔知點解個仔脾氣似我咁臭，但係讀書就唔似我咁醒（我小學真係唔溫書都科科9X分，年年考全級頭10名架）……

都話冇付出就冇收穫架啦，成日淨係要打機睇電視，但係又冇成績比我睇到，咁我真係好難唔做虎媽架喎。老公又成日唔緊唔緊個仔D成績，睇怕真係擺明要我做衰人，日日鞭打策個仔讀書啦orz

輕芝士蛋糕（電飯煲版）

作為一個職業媽媽，開焗爐呢D咁大工程嘅嘢就梗係可免則免啦！但係，如果想食芝士蛋糕，但又唔想開爐、唔想睇火咁又點呢？一個西施電飯煲就幫到手喇。

材料：

忌廉芝士 cream cheese block　125克

牛油　　　　　　　　　　　　30克

鮮忌廉 whipping cream　　　　100毫升

砂糖　　　　　　　　　　　　20克

蛋黃　　　　　　　　　　　　2隻

蛋白　　　　　　　　　　　　2隻

檸檬汁（可用白醋代替）　　　數滴（可不加）

雲呢拿油　　　　　　　　　　2滴（可不加）

低筋麵粉　　　　　　　　　　8克

粟粉　　　　　　　　　　　　8克

做法：

1. 忌廉芝士及牛油以熱水座溶

2. 加入鮮忌廉、蛋黃、雲呢拿油及15克糖，拌勻

3. 低筋麵粉及粟粉過篩

4. 將麵粉加入芝士溶液中，拌勻

5. 將檸檬汁加入蛋白，以打蛋器打成泡沫狀；然後分2次加入剩餘5克糖，並繼續發打蛋白至企身

6. 分2-3次把蛋白加入芝士溶液中，並輕手拌勻

7. 把蛋糕溶液倒入電飯煲中，並按煮飯鍵

8. 當電飯㷛由煮飯模式變為保溫模式之後，按 reset 鍵重新煮飯。重複2次（即共煮3次）

9. 把電飯㷛內膽連同蛋糕放入雪櫃雪1小時，以便脫模

心得：

1. 檸檬汁（白醋）可令蛋白更易打起並且不易下塌，但沒有加也不會影響味道

2. 雲呢拿油可辟除蛋腥味，但落太多反而會蓋過芝士味
3. 想蛋糕更滑身無粉粒，可以在步驟(4) 之後再過篩一次，才加入已打起的蛋白
4. 可用牙籤刺下蛋糕，如沒有濕漉漉的蛋糕溶液黏附著就代表蛋糕已熟
5. 蛋糕溶液最多只可到飯㷛內膽1/2高，要預留空間給蛋糕發大

我個2人用（最多煮4碗飯）電飯煲前後煮咗30min+30min+30min=1.5hrs，快唔快就見人見智啦，不過就肯定唔駛睇火唔駛怕傳統隔水焗會乾水或者蛋糕面焗燶XD

另外就係一定要用西施煲（即係不沾內膽、煮飯無飯焦果種），如果唔係一定黐哂底（上次貪內隴細試過用阿媽寄放我屋企嘅一人hand carry飯煲，明明話係不沾內膽，但最後黐到甩唔到煲orz）

仲有就係可以用同一條recipe，以乳酪（yogurt）代替忌廉芝士，再減少少鮮忌廉份量，一樣可以整到好好味嘅乳酪蛋糕（電飯煲版）架！

小學雞笑話兩則

話說有日我媽叫阿仔做補充練習……

填充題（任填、無字揀）

__ 人　（開放式題目，參考答案為「男人 / 女人」）

阿仔諗咗好耐都諗唔到填乜嘢字先配到詞語。

我　　　︰「有D咩人呀？你成日發脾氣鬧我果D呢？」

仔　　　︰（忟）「諗唔到呀。」

我　　　︰「有D咩字成日形容人嘅呢？」

仔　　　︰（諗咗一陣）「我知，蠢人！（懶醒mode）」

我＆我媽︰（爆笑XDDDDDDDDDDD）

其實，我一心諗住guide佢答「好人」「衰人」咋，點知阿仔無啦啦就爆句「蠢人」！最蠢就係佢答咗都唔識寫嘛……寫好人咪好囉，一定識寫先嘛！

------------------------------------

呢一日，到我同阿仔做補充練習……

造句題，用詞語「可愛」造句子

仔︰「妹妹很可愛。」

我︰「咁你識唔識寫『妹妹』兩隻字先？考試要寫識寫嘅字先得架。

　　　如果唔係，唔寫、或者寫錯字就會比老師扣分架喇。」

仔︰「咁寫『媽媽很可愛』啦！」

我︰（無言）

仔呀仔，阿媽知自己天生麗質，係靚女一名，不過靚女唔係用「可愛」嚟形容架嘛XD