肌膚測試DIY

前幾日貪得意買咗支肌膚水份計，除咗可以check吓濕度之外，仲可以check油份同皺紋，最重要係支棒棒只係百零蚊，用嚟試吓屋企D保濕產品功效有幾work，抵玩啦。

好，趁今日有時間，試吓先！

首先係洗乾淨塊面，等半個鐘⋯⋯

好彩都唔算太差:)

好，之後搽保濕水、精華、面霜⋯⋯再試

嘩，塊面即刻充滿光澤，不過水份都係差少少，睇嚟要加強保濕先得！

羊腩煲

天氣凍，老公話最好就係食羊腩煲暖吓身。咁複雜嘅嘢我就梗係唔識煮啦，所以唯有去買外賣羊腩煲啦！

好彩公司附近有X田超市，細盤（都大過個即食麵煲架）只係$145，仲跟埋腐乳醬，算係咁啦！大盤都係$168，不過屋企得兩個人食飯，買大盤咪食唔落其他嘅？

買多個外賣椒鹽蝦，買條菜，$210埋單，唔使煮餐死，輕輕鬆鬆咁就一餐，正！最緊要滿足到老公要求嘛！

另類洗腦教育

廣告有云，電視節目有好多種，在職媽媽平日冇時間同阿仔一齊收睇，唯有篩選吓、買D有益嘅卡通片幫佢進行另類洗腦教育。

呢套片，冇30年都有25年，難得見佢有DVD set，即入一套比婆婆播比阿仔睇，好過佢成日睇埋D咩古怪卡通片。

希望阿仔睇得多，潛移默化之下可以沾染多D書卷味啦，哈哈！

芝士窩夫

早幾日整窩夫剩咗啲材料響度，趁今日冇野做兼有時間，又整吓其他嘢先～

材料：

低筋麵粉            60克

高筋麵粉            60克

牛油溶液            50克

乾酵母               半茶匙

鮮奶                   100毫升

鹽                       少許

糖                       5克

巴馬臣芝士碎     20克（可隨意調整）

（可做約6件）

做法：

1. 鮮奶加熱至微溫，然後加入乾酵母

2. 高筋麵粉及低筋麵粉拌勻，然後加入鮮奶、糖及鹽，拌勻

3. 加入牛油溶液拌勻

4. 放置一小時或發酵至兩倍大

5. 加入巴馬臣芝士碎拌勻

6. 窩夫機預熱2-3分鐘

7. 用匙羹或剪刀分割成適當份量，放在窩夫板模正中央，焗約7分鐘便成

心得：
牛油溶液一定要後下，才有油酥效果

落重牛油同芝士碎嘅窩夫真係好邪惡，趁新鮮焗起嘅時候食，外層脆卜卜，食落好似油酥餅咁，但係又好重芝士味，真係叫人食唔停口啊！

列日窩夫

近年好多港式日式台式西餐廳都好興用窩夫、多士等整甜品，咁窩夫機又入手喇，係時候去搵窩夫食譜搞搞佢。

睇咗好幾款食譜，決定試整近日大熱嘅比利時列日窩夫先^^

列日窩夫嘅特點係圓形、食落有少少似麵包、仲有外面甜甜地焗到焦糖色——精髓就係用酵母發酵、仲有用咗珍珠糖pearl sugar。

材料：

高筋麵粉    100克

低筋麵粉    110克

牛油融液    100克

鮮奶           100毫升

乾酵母       半茶匙

珍珠糖        50克

雞蛋            1隻

（可做約8件）

做法：

1. 鮮奶加熱至微溫，然後加入乾酵母

2. 高筋麵粉及低筋麵粉拌勻，然後加入鮮奶及雞蛋，拌勻至見不到麵粉

3. 加入牛油融液拌勻

4. 放置一小時或發酵至兩倍大

5. 加入珍珠糖拌勻

6. 窩夫機預熱2-3分鐘

7. 窩夫模掃油

8. 用匙羮或剪刀分割成適當分量，放在窩夫板模正中央，焗約5-6分鐘便成

窩夫變奏版：

在加入珍珠糖同時，加入朱古力粒，即變成朱古力口味窩夫

窩夫機比焗爐好嘅地方係預熱快、烘焗需時短、成品唔會失手走樣、焗到一半又可以隨時打開檢查，真正快靚正！比起焗麵包、蛋糕吓吓都要焗最小半個鐘，窩夫機真係啱哂我呢D唔駛急、最緊要快嘅香港人。我諗呢個窩夫機應該可以陪我玩一段時間XD

三文治窩夫機

早排幫阿媽買風筒，見到某世家三文治窩夫機賣$2XX，諗起之前夾芝士三文治咁大工程，就心郁郁想買部靚機返屋企，既可以整飛碟三文治，又可以方便第時阿仔讀小學整早餐俾佢食。

上網睇過某日本牌子$11XX，未開賣就斷哂貨，現貨要12月先至有，我呢啲得三分鐘熱度嘅人，一來唔捨得，二來又等唔切，於是決定平平哋買部Kenwxxd玩，$3XX，跟機有三塊模板，可以整飛碟三文治、窩夫、panini，真係玩厭都唔肉赤XD

搵時間再去試機先～

我的office孖寶

氣管敏感底嘅人，本來一年365日都好易咳同cam cam。轉天氣就更甚，幾本上唔幫趁醫生幾乎係冇可能。真係「閒時咳幾聲，病時咳甩肺」！

病咗就冇得好講，但係平時、尤其係返工、出街，點樣keep住唔咳？真係要有孖寶至得——枇杷膏同喉糖！

唔好睇少咳呢樣嘢，氣管敏感嘅人咳起上嚟，真係有一粒塵落咗喉嚨，都可以咳到變聲兼扯蝦。記得有一年就係因為入羽絨被袋，咳到成晚hehe聲冇得瞓。另外又試過一上巴士就咳咳咳咳咳，愈多人就愈咳得勁，咳到落車有啖新鮮空氣先唔咳。

所以我office枱頭一定有孖寶，就係等我咳起上嚟有D嘢潤下個喉嚨，止吓咳先！

至於去街手袋，雖然拎唔到咁多嘢，但係都係長期有包喉糖晌度救命！

所以唔好奇怪點解我會成日食糖同埋食唧唧條，因為我要鍚住我條氣管嘛XD

重拾書本之重見天日

漫長嘅top-up degree終於順利畢業，阿仔又大咗，份工又清閒咗，於是近近哋响屋企附近搵日文學。

已經係第三次學，又係由50音圖學起，希望今次真係可以學得識——最少都可以識睇日文說明書同打日文game先XD

趁今日有時間，響櫃底掘返以前買落嘅日文書出嚟先～

又到秋冬

又係時候滋潤吓 ：）

趁得閒浸定花膠螺頭，就隨時都可以煲湯啦！

流心芝士撻

近期香港大熱嘅流心芝士撻——我當然唔識整啦！之但係要我山長水遠去老尖老銅排一個鐘食個正宗日本BaXe或者半X工房流心芝士撻，又唔係我性格。

買餸行過惠X入面嘅麵包店M拾X（即係美X），見到$20兩個（單買$12一個）流心芝士撻，又平又唔駛排隊，一於試一試佢。

因為凍食，所以feel唔到有幾香幾流心；但作為$10一個小食，呢件撻都算合格有餘喇，起碼芝士份量都算多，同埋都食到有芝士味。

搵個weekend去買個新鮮出爐嘅堅流心芝士撻再試真D先～

三吋

正所謂「打風唔成三日雨」，呢幾日三時兩刻就雷暴警告，仲要返放工時間落到倒水咁，真係有遮都死！

今日就嚟個let's get wet！有遮都盡濕——由頭濕到落腳、由面濕到落底！

衫濕褲濕冇辦法，唯有換過件外套同用風扇吹乾對腳（條褲濕到上大脾兼滴哂水orz）。好彩鞋濕咗可以換過對（公司有好多客送比我嘅鞋辦）。

不過好死唔死，今日公司補食中秋飯，唔想條褲又濕過，唯有著對高D嘅鞋落街啦。

真係著完即刻覺得自己高人一等XD

不過真係未試過著三吋高踭鞋，新鞋刮腳，加上本人體重，對腳堅痛到爆囉orz

唉，高踭鞋呢家嘢，都係同我唔夾㗎喇！

乳酪（優格）蛋糕

屋企雪櫃有幾杯原味乳酪（優格/yogurt）。原本諗住要嚟整KXC鬆餅（十幾年前果隻舊款鬆餅），突然諗吓不如改變用途用嚟整麵包做早餐；上網搵recipe，居然發現蒸優格蛋糕。趁阿仔瞓咗，冇人騷擾我，一於又試下先。

材料：

鬆餅粉*                     100克

原味乳酪（優格）      70克

雞蛋                              1隻

菜油                            10克

做法：

1. 將以上材料拌勻至見不到粉狀物

2. 倒入蛋糕模（最多2/3滿，一定要預留位置讓蛋糕膨脹）

3. 用錫箔紙封頂（防止有倒汗水）

4. 放置30分鐘（見到氣泡為正常現像）

5. 放入熱蒸爐蒸25-30分鐘便成（時間視乎蛋糕模深淺而定）

*註：如無鬆餅粉可以自己DIY

       

        低筋麵粉       80克

        泡打粉            4克

        奶粉               6克

        糖                 10克

將以上4種材料一併過篩或放入密實瓶搖勻便成。

剛蒸起嘅蛋糕有好香乳酪味，但凍咗就聞唔到。味道方面，食落有少少乳酪味，不太甜，有少少似日式蒸芝士蛋糕嘅感覺，正^^

足料自家制蘑菇飯汁

相信好多人都會試過——去某鄉雞叫蘑菇飯，打開盒飯⋯⋯飯少、汁少、蘑菇更少！

之前上網搵過蘑菇飯汁食譜，今日就趁老公唔返嚟食飯，自己試新嘢^^

蘑菇飯汁精粹在於gravy，但係呢罐嘢只有citysxxer先有得賣，仲要係長期缺貨！據講正宗做法係用火雞汁turkey gravy，可惜連我都未見過佢真身！今次我用普通牛扒汁，食落味道差唔多，最少我分唔出先！下次可以試吓普通超市都有得賣嘅粉狀turkey gravy，睇吓味道如何XD

材料：

Gravy          1罐

切片蘑菇     1罐

免治豬肉     1包

洋蔥            1/4個（切碎）

蒜蓉            1湯匙 

水                約80毫升（半罐）

黑胡椒粉     少許

做法：

1. 先醃一下免治肉碎備用

2. 炒香洋蔥碎 

3. 待洋蔥碎開始透明軟身時加入蘑菇碎略炒

4. 加入肉碎炒至八成熟

5. 加入蒜蓉略炒

6. 加入gravy及水，轉中火煮至滾起

7. 轉細火，加入黑胡椒粉，略炒至肉汁稠身便成

心得：

1. 免治肉碎可落可不落

2. 醃肉時最好多加點水份，方便炒肉碎時容易推散

3. 蒜蓉太早落鑊反而易燶，所以不要用來起鑊

4. 想蘑菇汁更稀可多落一點水

5. 小朋友不吃辣可不加黑胡椒粉；相反嗜辣朋友可在加黑胡椒粉同時，加入1-2滴tabasco調味

濾水器

近日最hit嘅話題非「鉛」莫屬。我呢D小師奶，咩過濾法呀、osmosis⋯⋯早就還番哂比老師啦。不過，就算屋企個濾水器隔唔隔到重金屬，都記得要定期換濾芯/洗濾芯先得，否則真係衰過唔用！

See！明明舊年年尾定今年年初先洗過嚟，半年多少少之嘛，咁快又黃哂，真係恐怖！我諗真係唔好懶，三個月就洗一次先得！

叉電線

响呢個數據流動嘅年代，每個人屋企都有最少一件高科技電子零件，可能係埃瘋三叔罪犯滔天等智能電話又或平板電腦；就算冇高科技電子零件，outdated電子零件如落機亞、冇得撈阿等電話；甚至再low-end少少如portable hard disk 、尿袋、甚至今期潮物芭蕉扇⋯⋯不論係高科技定低科技、貴嘢定平嘢，佢哋都有一個共同點，就係有條叉電線！

唔好睇少呢條線，一件電子零件跟一條線，換一次新機又跟多一條，你屋企隨時有十條八條長短不一嘅線响度！

不過多還多，D線總係有個共通點（尤其某果派），就係——

爆線！真係無言！

USB線還好，條線價錢平而且唔「獨食」，真正死咗都唔駛恨。Lightning線相比起就真係貴到冇朋友兼自私到冇朋友，果派專用仲要新ios打擊埋老翻，焗你班果民用老正orz

唉，生果可唔可以花多D錢去硏發一條長命少少嘅lightning線比我等果民？

香蕉蛋糕

難得打風提早收工，煮埋飯洗埋碗都只係八點。成晩流流長，於是又响廚房做阿茂——整餅。

上個星期買咗隻蕉，熟哂都冇時間處理，之後比我壓成蓉放咗落雪櫃，而家啱晒喇！

材料：

香蕉    1-2隻（熟香蕉先夠香）

雞蛋    1隻

牛油    30克（先行融化）

雲尼拿香油    1-2滴

低筋麵粉    130克

泡打粉    半茶匙

糖    75克

牛奶    40-60毫升

（以上份量可做6"圓模 x 1"高蛋糕一個）

1. 預熱焗爐約180度

2. 香蕉壓成蓉，加入雞蛋、牛油融液、雲尼拿油、糖、牛奶（先落一半）拌勻

3. 麵粉&泡打粉過篩，加入（1）

4. 用刮刀輕輕拌勻至沒有粉粒。如果蛋糕漿太乾，則加入剩餘牛奶

5. 放入焗爐焗約30分鐘

其實我整蛋糕同麵包都唔會跟足recipe，大部分時間都係base on屋企有乜現成材料再fine adjust。例如屋企雪櫃有好多楓糖漿，我就用楓糖漿代替部分糖；冇牛奶就用水代替，再加入適量奶粉（好彩阿仔仲未介奶XD）；然後最懶亦係最唔跟足recipes就係貪方便用個無得控制溫度嘅微波焗爐焗嘢！總之心態係反正食唔死，試吓無妨嘛（嘩哈哈哈哈）。

暑期勞作

七月，又係放暑假嘅日子。為咗想阿仔响假期過得充實D、婆婆湊得輕鬆D，我呢個好媽媽當然就幫阿仔報咗三四個暑期班啦！不過日日返暑期班，對小朋友殘忍，對我個荷包仲殘忍，所以就去咗太子某美術店買定D勞作包「看門口」，一來可以培養小朋友藝術感，二來可以訓練佢手指靈活，三來可以親子，真係win win win XD

而家D勞作材料真係又多款式又靚，入到去美術店花多眼亂，少D定力真係好易出事XD 見到咁多材料，我真係有一刻想去學art學做手工㗎，不過我能力有限兼財力欠奉！唯有用我嘅智慧搭夠，希望做親子手工果陣唔會令阿仔失望啦：）

銀包

銀包呢樣嘢，同媽媽手袋一樣，只會愈買愈大個。點解？因為愈嚟愈多credit card、覆診卡、membership卡、仲有接送證、圖書證、屋苑住戶證⋯⋯真係嗡得出都有。

不過銀包呢樣嘢，又同媽媽手袋唔同，媽媽手袋一年365日都係揹住同一個，但一年總會換一次；銀包雖然都係一年365日都用同一個，但通常都係幾年先換一次。點解？因為我有幾個銀包，而且每個銀包功能唔同，所以每日平均使用率冇咁高卦XD

而且更重要係，平買則粗用，貴買則慳住用，最大原則係用到殘先準換XD

See？冇記錯呢個銀包已經用咗三年以上！真係唔殘唔換㗎！

不過正如前面所講，銀包只會愈換愈大，睇下⋯⋯

咁都唔算大？梗係啦，因為仲有呢個⋯⋯

呢個⋯⋯

同呢個⋯⋯

真係冇呃人！除咗粉紅色果個專放membership卡之外，其他三個都係日日會帶响身嘅銀包（專放身份證、credit card、覆診卡、公司卡片同銀紙）、卡片包（專放八達通、住戶證、接送證、公司shuttle bus card、少量membership card同少量銀紙）、以及散子包（專放大餅）。所以話，點解媽媽手袋會愈嚟愈大？哈哈哈XD

姓乜？

由細到大，join membership填表都習慣留英文姓名多過中文全名，因為一來方便人哋入機（尤其當年電腦都未普及，更唔好講咩倉頡速成等中文輸入法），二來我手中文字都幾有「性格」。所以由好細個開始，就已經面對一個問題——比人叫錯姓。

CHAU，寫全大楷還好，一寫成Chau，唔知點解就有好多人自動腦內補完變成Chan，然後就會叫咗做「陳」小姐或者「陳XX」，所以由細個開始，比人叫做「陳XX」我都自動波應咗先，再糾正對方。

Chau睇成Chan都唔奇怪，但除咗「陳」小姐之外，我仲試過不止一次比人叫錯做「趙」小姐。Chau同Chiu，其實手寫也好睇機都好，都好難睇得錯，但偏偏就真係有人打嚟搵「趙」小姐⋯⋯所以一比人叫錯做「趙XX」，我都會唔係幾老黎咁應機㗎。

不過「趙」都未係最離譜，最離譜係有次去舖頭買嘢，出示member card儲分，之後個姐姐叫我做「朱」小姐！Chau同Chu，我真係R哂頭都唔明點樣可以get錯姓囉，所以果次真係開聲話佢知我唔係姓「朱」，點知對方再次睇錯做「趙」⋯⋯真係心裡面xyz咗囉。

其實做服務性行業，真係好忌叫錯個客姓名，尤其cold call果D，一打嚟就叫錯，我係客真係覺得你唔pro兼唔重視我！就算你即刻糾正到，我係客都冇mood聽你sell落去啦。況且而家係2015年唔係1995年，電腦已經唔係剩係得英文輸入法，銀行打嚟點可能仲會叫得錯先？

講到尾，CHAU即係點讀同姓乜？Cheung Chau、Peng Chau、Ap Lei Chau識唔識？唔緊要，Chrissie Chau你識喇卦？

p.s. CHAU唔係普通話拼音，亦唔係外省人拼法，而係絕對百分百港式拼法。至於點解唔用CHOW而用咗CHAU，咁就真係要問七八十年前幫我阿爺出身份證嘅入境處職員喇。不過我相信當年入境處職員都係是是但但，因為我有D阿叔都係用CHAU但有D阿叔就係用CHOW，變相無啦啦比人改咗姓XD

搵食艱難

難得父親節，又難得唔駛出奶奶度食飯，老公又話落雨唔去打波，留返晌度同阿仔食飯，咁就唔煮出街食啦，點知六點半落街一睇……美X等50張枱、小X包等150張枱、和X等200張枱、對面商場元X又等200張枱……

明明三年前搬返嚟果陣都唔係咁架！

點解？咪就係因為呢幾年馬鞍山愈嚟愈多人住囉！

話就話烏溪沙迎X開咗幾間食肆，但係食肆多時人更多；另外呢兩年市中心兩個場輪住裝修upgrade，食肆數量其實一路都比正常小；仲要海邊果堆私樓居屋附近得一兩間茶記、一間老M同一間酒樓……真真正正嘅僧多粥少，唔餓死都算偷笑喇！

最後好彩發現PIZZA乞寫住外賣自取30分鐘，唯有買外賣PIZZA啦！

之前都有同老公傾過換樓問題 (雖然點睇點計呢一刻都冇可能換到樓)，問佢烏溪沙迎X好唔好，點知佢話唔好！唔好唔係因為環境，而係因為冇啖好食！佢又話佢同事去過大圍X岸，會所游個水要$40，咁如果non-member $40唔過份丫，我屋企會所成日non-member都係$40，不過細D之嘛XD　之但係X岸唔係我杯茶喇。雖則有人話3分鐘就可以由住宅大堂行到上火車月台，但係我唔係下下坐火車架嘛，如果要我返工時間坐巴士行獅隧，冇得坐不特止仲要驚巴士飛站；另外屋企樓下冇食肆冇商場，買餸都仲要日曬雨淋過對面屋村，我就情願住舊D揀返新X市喇，最少沙田市中心真正係交通方便有得shopping有得揀食乜先啦！

講到尾，老公話我同佢都係生成辛苦命——鍾意住晌大型商場上蓋物業，落街唔駛怕日曬雨淋，但係就行街食飯都要同人迫餐死囉XD

話咁快又2015年

唔覺唔覺，晌馬鞍山置業已經兩年，阿仔亦由一舊唔講嘢嘅飯團變成一個多嘢講多嘢問嘅死小孩。

時間過得快，估唔到樓市升得仲快！想當初市場成日話加息加息、就跌就跌，點知一個唔該政府整多個DSD，成個市場嘅細單位即刻好似火箭升空咁升到追唔到！我現居隔離細兩房，兩年前我諗值三百頭啦 (當年我沙田市中心細兩房都只係賣咗三百中)，點知上個月聽到地產同個睇樓客講話業主開價四百中尾！嘩，前後兩年升咗百五個，升幅成4X%！又一次證明自住唔怕買！

至於我自己住陣果間，兩年升咗都差唔多百五個，不過升幅就一定冇4X%喇。

不過呢兩年成個市場扭曲哂就真嘅，由於進一步收緊樓按措施，而家買樓，樓價$400-$600萬嘅中小型單位，已經由兩年前最多借七成 (另加HKMC一成)，改成$700萬以下最多借六成(另加HKMC一成)，壓測亦由收入50%再下調到45%！而細lumsum嘅$400萬以下單位，首次置業人仕就仍然可以借足九成 (連HKMC)。所以呢兩年$400萬以下已經比人搶得八八九九，就連自由市場嘅公屋居屋細單位都比人推到$3XX萬，只因lumsum細，連律師厘印，唔駛$60萬就可以做業主！

十年人事幾番新，當年我娘家層一手居屋只係幾十萬，馬鞍山市中心新樓都只係百幾粒，而家四百粒晌市中心都買唔到個細兩房！

真係愈諗就愈覺得自己有少少運仔，因為當日夠膽買第一層樓，再夠膽賣出跨區換樓！不過如果當日老公第一下就肯買馬鞍山，我哋又未必有膽同區換大D喇！真係時也命也！