Selphy CP910

屋企有個返學嘅幼稚園生，做家長就好頭痕。一時又話親子功課、一時又話要交家庭照。而家個個都影數碼相，鬼會曬相咩！仲要今日通知後日交，去曬都曬唔切啦！

果晚硬著頭皮用屋企個color print 印相但係衰咗，最後焗印A4 color，真係貴到冇明友 （我一排color ink印得幾十張㗎咋）。思前想後，都係買部print相專用機先得。

揀呢部機原因只得兩個，一係可以print 4R，二係呢個package除咗跟機果36張明信片之外，仲包108張4R同18張卡片size貼紙連紙匣，平過單買相紙。

呢個年代，air print已經唔係咩新科技。呢部機嘅setting都算簡單，而且我部「埃瘋陸匹氏」唔需要裝專用app 就可以連接到部Selphy，真係超方便。對比起我屋企部第一代air printer ，唔好話「埃瘋陸匹氏」，連埃劈二代同notebook都要裝app裝software 先print 到color job同相，灰爆orz

Selphy 機身唔算大，同mini 埃劈差唔多，對於屋企雜物多到冇朋友嘅我嚟講，機身細小先易於收藏（用先拎出嚟），如果唔係又要頭痛擺放問題。

講咁耐，print 相質素得唔得先？咁當然唔夠曬相舖啦，但以家用機嚟講算見得人喇，最重要係可以幫阿仔交功課嘛XD 

$15XX抵唔抵見人見智，但吓吓去曬相舖曬老min十蚊，少數一樣怕長計，鬼叫而家養個小朋友唔平咩！

人上人

如果話「吃得苦中苦，方為人上人」，咁我都幾肯定自己就算唔係人上人，都可以歸類係出類拔萃嘅人，因為我由細細個開始已經成日飲苦茶，就算而家，只要唔係大病，都係去睇中醫飲苦茶多過睇西醫食西藥⋯⋯

同陽光玩遊戲

我諗真係冇乜邊個可以好似我咁，唔坐窗口位都可以感受到太陽嘅溫暖！我公司新office，日日下晝四點九準時西斜，仲要由我老細房斜出嚟我張枱orz 

好彩我唔係吸血疆屍啫，如果唔係無啦啦一線曙光射落嚟，真係唔化灰都燒燶XD 

埃瘋伍vs陸匹氏

陸匹氏果然夠哂大，不枉我等咗一個月XD

我要做天后

難得有半日風假，乘機梳乎下先XD

至愛系列之一

今偶然行過玩具舖見到我至愛，當然要即刻帶佢返屋企啦！

點知比老公發現，仲要爭住比錢，佢話小財唔出大財唔入喎！激死！最慘係佢教識埋阿仔一句「呢樣一定要買」，搞到阿仔一見到玩具就話「呢樣一定要買」orz

熊貓曲奇出爐喇！

呢幾盤嘢，足足印咗三個鐘orz

真係企到我腳仔軟orz

希望阿仔同佢D同學仔食得開心啦^^

附送牛油曲奇食譜一份

材料

牛油 (室溫解凍)　　200g

低筋粉 (過篩)　　　300g

砂糖　　　　　　　100g

蛋黃　　　　　　　1隻

1）牛油放室溫解凍至軟身，切粒，用打蛋器打至淡黃色

2）分兩次加入糖並繼續用打蛋器打勻

3）加入蛋黃並用打蛋器打勻

4）分2-3次加入低筋粉並用膠刮拌勻（切勿使用打蛋器）

5）用保鮮紙包好麵團並放入雪櫃醒麵最少30分鐘

6）取出後略回溫便可用麵粉幹壓平麵團以便印模，或壓成條狀切片

7）以180°焗8分鐘，取出反轉再焗5-8分鐘便成

註：

1）整雙色曲奇可在步驟4後把麵團分半，在其中一份麵團加入約15-20g可可粉，或30-40g美祿粉，視乎曲奇顏色

2）砂糖可改成糖粉或糖霜

3）蛋黃可改成全蛋，但會令麵團過濕難以甩模

以上份量可做4盤/約64塊熊貓頭曲奇

問︰熊貓曲奇餅模邊度有得賣？我見過 cit_sup_r 有得賣，不過賣成$1XX。網上search到某D烘焙店都有得賣，冇記錯都要$5X。最方便亦係最唔方便就係上淘X買，我呢個只係淘咗RMB1X，不過單買一個模再加運費就梗係唔划算啦XD

辛苦攞嚟至在威

話說阿仔學校下星期結業禮，老師要求家長準備D小茶點比小朋友帶返學校，婆婆睇錯隔離班notice board，以為有家長整大製作，於是同老師話整曲奇orz

老師聽到梗開心啦，仲話「好呀，親子製作」-_-"

我呢個做媽媽嘅唯有趁呢十日預習下先啦！

好彩之前淘咗幾個模具，不過印模曲奇真係好麻煩！第一舊粉團要夠凍，如果唔係好難甩模；第二做熊貓曲奇舊粉要夠薄，如果唔係好難熟；第三D有坑模只可以印一次，印一次洗一次，如果重複印又甩唔到模orz

最最麻煩係又要舊粉凍又只可印一次，搞到舊粉要成日出出入入雪櫃，個人同個雪櫃都好忙orz

煩煩煩！好彩提前試做，如果唔係到時真係冇貨交！

仲話親子，咁麻煩嘅步驟，點叫阿仔幫手？叫佢幫我食晒D失敗樣衰作就差唔多XD

虎媽？苦嗎？苦媽媽

以前成日聽人講話D虎媽chur個小朋友chur得好勁，幫佢報6、7、8樣課外活動都唔夠，仲想幫佢報多幾個，咁就算個小朋友唔係贏在起跑線上，都唔駛輸人幾條街。原本都諗住自己唔係虎媽、亦都唔會做虎媽，點知……

真係要有小朋友、又要到果個階段，你先會明白點解D父母要幫個小朋友報百九幾樣課外活動。

話說暑假就嚟到，我老媽、即係阿仔婆婆見學校派紙報 summer course，就叫我幫阿仔報名。以我咁懶懶閒嘅性格就梗係唔到 last minute 都唔去報名啦，點知一寄 cheque 過去，人哋就打嚟話 full 咗！唉，果個course係分3個星期上，每日3個鐘，好似返學咁，最重要係——平！$1800三個星期15堂，每日返三個鐘，除番開只係$40一個鐘，平過托管！雖然我冇托管需要，但我媽話唔想阿仔放個半月暑假 dum 懶個人喎 (人辦在此XD)！

報唔到平 summer course，唯有周圍搵其他 summer course 比阿仔返啦！

到而家為止已經幫阿仔報咗兩個 summer course，一個係英文drama course，唔知阿仔鍾唔鍾意，但係果間嘢口碑唔錯，兼阿仔有同班同學報咗。另一個係輕黏土班，旨在比阿仔練習吓手指仔，而且阿仔一向都好鍾意玩泥膠。仲有一個中文認字 / 記憶力 course 想報，不過有得試堂，我會比阿仔試完先決定報唔報。好果真係報得成，再加埋而家學緊畫畫同游水，即係話阿仔呢個暑假將會返5個course！聽落真係好多，不過其實都只係一個星期返3-4日，每日唔過3個鐘！計起上嚟其實真係唔誇！

如果真係講誇，幫佢報 summer course 嘅費用就真係誇張喇！3個 summer course (真係報哂嘅話) 加埋成$4000，仲已經係 6/30前報有 early bid discount ，除返開六個星期即係平均$2700一個月，仲貴過交學費 (有學卷幼稚園學費只係$8xx一個月)！你話而家究竟我係虎媽定苦媽丫！

仲話生多一個喎，而家生一個都係啱啱好夠駛，如果生多個，奶粉、尿片、供 (樓)、(讀) 書、教 (育)、(課外) 學 (習) 樣樣都係錢，真係要中幾個六合彩頭獎一注獨中先搞得掂！

圖書證

n咁多年前比人偷手袋 total loss，電話、身分證、回鄉卡、credit card、圖書證……乜都唔見哂。原本都諗住呢世都唔會再有機會去公共圖書館借書，所以一直都冇去報失 / 補領。點知為咗個拖咗幾年就嚟都死期嘅 final year project……

事源係阿 local tutor 比咗個書名我叫我睇完先做 project，我都冇諗住去借，諗去直接去買本書o架喇，點知上網一check……本書係1997年出版，市面早就冇得賣。唉，唯有上去圖書館網頁睇吓有冇呢本書啦，點知又有喎！

整定點都要去搞返張圖書證，再去搞預約借書 (因為馬鞍山同沙田都冇果本書，為免嘥車錢嘥時間自己晌書架搵，不如比錢做預約好過！)。

而家同十年前真係唔同咗！而家一張證可以借8本書，兩個星期睇8本，除非係漫畫書或者無字天書啦，如果唔係，兩個星期都冇乜可能睇得哂！哈哈！

等我的起心肝搞埋個 final year project，一定會帶阿仔去一次圖書館借書！

難頂嘅hand cream

開蓋聞都唔覺，擠落手搽先覺，真係好難頂！

好彩拎咗返公司用，如果唔係一定臭死阿仔orz

講咁耐，其實係咩味？Absinthe，苦艾酒，我都唔知係乜，維基話即係茴香味，咁咪即係印度西施果陣味？

貪得意、種羅勒（11）

唔覺唔覺，已經種咗差唔多3個月喇，而家最大果棵已經高過個掛盆喇～

不過始終都係晌盆仔種，冇乜營養，所以Ｄ葉唔太綠，而且D老葉仲有D黃添，所以都係要「引刀成一快」，等其他葉可以生靚D

士多啤梨忌廉蛋糕

女人，唔多唔少都對士多啤梨有好感。

女人，唔多唔少都對蛋糕又愛又恨。

女人，唔多唔少都對白色有憧憬。

士多啤梨＋白色＋蛋糕＝外表討好&好好味嘅士多啤梨忌廉蛋糕，今日終於可以一試！

大大粒士多啤梨，酸甜適中，加上鬆軟而唔太甜嘅蛋糕同香滑忌廉，正！

不過，間唔中食一件好喇XD

冇喼用？

年年某田大減價，總會見到好多人（仲要係香港人居多）買喼，究竟係而家D喼唔襟用所以一減價就要入定一兩隻丫、定係當D喼係衣物箱用嚟pack轉季衫？

我好好奇，究竟每個香港人平均擁有幾多隻喼呢？

煲劇

終於都係抵擋唔住《星星》熱！諗住等tbb配音版，但係第二集就已經比男主腳對眼電親，最後唯有死死地氣借助老公D「高科技電子零件」，晚晚食完飯洗完碗坐晌度「煲劇」！

因為要返工，星期六日又要陪阿仔玩，所以都用咗一個星期先煲哂21集！唉，年紀大喇，一晚煲兩三個鐘、凌晨一兩點瞓係極限喇，你估仲係十八廿二、晚晚煲到三四點、第二日七點起身返工咩！

講返《星星》，原本係諗住睇全智賢 (個女主腳人設根本就係《野蠻女友》嘅華麗明星版)，點知最驚喜係男主腳金秀賢！佢對眼真係好識做戲，加埋佢個cool樣，唔怪得好多人都被「都教授」電暈～

套劇嘅編劇都好勁，完全滿足哂一般少女中女靚太靚媽嘅 fantasy︰靚仔＋有錢＋有學識＋一心一意 (最好係初戀)＋愛得死去活來，佢仲要再加埋外星人背景，可以瞬間轉移 (一講呢個terms我就諗起DBZ悟空orz)、時間停頓 (Sailor Pluto)、隔空取物 (其實愈講愈似Orange Road春日恭介)……咁華麗嘅男主腳人設，真係所有懷春少女、痴心中女、苦悶靚太、抑鬱靚媽……想唔中毒都唔得！

真係好耐都冇試過咁「肉緊」一套劇！上幾個月追《秘密花園》都係追劇情，但主要係因為「靈魂交換」＋阿蘇 (tbb配音) 先有動力追落去！

對上一次咁「肉緊」，已經係想當年嘅台版《流星》喇……時間真係過得快……

食過《星星》呢劑超特強浪漫藥，下次仲可以食D乜嘢藥先可以滿足我嘅 fantasy 呢？

貪得意、種羅勒（10）

呢排日日都落雨，屋企冇陽光之餘，我仲要日日開冷氣扯乾哂泥土面D水份，搞到棵嘢好似冇乜點高過咁……

好彩，佢自己都識「搵食」，D根已經生哂落盆底！

不過，新生出嚟果D葉就好明顯唔夠營養，掂一吓就甩 :(

貪得意、種羅勒（9）

D葉愈來愈大塊^^

貪得意、種羅勒（8）

第三棵芽繼續茁壯成長^^

貪得意、種羅勒（7）

冇見幾日，又高大咗，而且已經有四塊葉^^

另外原本就死嘅第三棵芽，響水養咗幾日，而家生番幾條根，健康過之前，於是我又放番佢落泥試種，希望佢會長大啦~

貪得意、種羅勒（6）

大鑊！D水吽蟲！仲要有幾條！

嗱嗱聲換水先得！

另外第三棵落咗水好似好咗！睇多兩日先！

貪得意、種羅勒（5）

頭兩棵都生得好好:)

但第三棵芽生得唔好，根部外露，養唔大:(

唯有試下掉落水改水種，睇下養唔養得大啦

貪得意、種羅勒（4）

而家有三棵芽喇^^

為咗唔好側埋一邊，呢兩日要轉一轉方向曬太陽先~

貪得意、種羅勒（3）

今日又高大咗，仲標多一粒芽

貪得意、種羅勒（2）

第三日就發芽喇^^

貪得意、種羅勒（1）

同老公、阿仔行過百貨公司，見到有可愛小盆栽賣，雖然價錢唔平 (成一舊水一盆orz)，但係都忍唔住買一盆返去屋企種。

個sales話3至4個月先會有收成，希望唔會令我失望啦~

媽媽代工系列：功課熊

阿仔呢間happy school，話就話冇功課做，但其實有好多親子勞作要家長參與orz

兒童節就嚟到，學校又好別出心裁咁諗到幫學校隻熊bear bear換新裝，仲要係用環保物料XD

好彩過年果陣有盒朱古力未食，就叫老公留番D包裝紙嚟做勞作啦！

經過一輪「趕工」，終於搞掂！

雖然唔算精美，但貼題，我比自己70分啦XD

20140330黑雨下的家

今年雖然只係過咗三個月，但係天氣就反常到冇朋友！三月尾二一日，落大雨都不特止，仲要係黑雨加冰雹！呢場大雨加冰雹，仲要搞到地標又一城變成瀑布城、又一水上樂園！

又一城未出事之前、剛掛黃雨，我已經好擔心屋企D窗會唔會滲水（冇計，諗返之前間屋，一落雨就要攝毛巾，十號波仲要入哂水我就想死！），點知轉個頭，見到新X市X田盞天花燈開水喉，我就知道場雨一定落得勁。果然，前後都冇一個鐘，黃轉紅轉黑，得咗！我就趁老公shpping完，即刻要求返屋企檢查！

唔係華o同長o嘅樓真係唔同D，加上剛剛20年樓齡（比舊屋新10年），D窗同牆都抵得住黑雨，冇水入屋！老公仲笑我驚青，話而家呢度「實淨」過之前，不過一朝被蛇咬、十年怕草繩，佢唔係業主又點會驚丫orz

所以呢，買樓一定要睇發展商、睇樓齡；入屋一定要睇窗台位、渠位。幾百萬買層樓，買完仲要擔驚受怕就唔好啦！

居屋補地價

講完綠白表，就要講吓乜嘢係補地價。

好多人都唔明咩係補地價。點先為知係補咗地價？點解同一個局屋盤會有兩個價錢？點解出面私樓買緊$3XX萬，而地產舖門口果個差唔多呎數居屋盤只係叫緊$1XX萬？

首先要明白一樣嘢，居屋嘅出現係因為政府要幫助市民自置居所而來，而方法就係以市場價再折讓比市民。折扣率係以政府出售果刻決定，一般30-40%左右 (實際折扣率上房署網頁查就知)。而當一手居屋業主要轉售佢哋個單位比非綠表買家嘅時候，就要先先補返當年嘅折扣率比政府，先可以出售。

講到呢度，記得唔知晌邊度睇過一個咁嘅形容︰補地價其實即係政府持有你間屋30-40%業權，你想賣樓唔係唔得，但係就偏偏比呢個「小股東」控制住，一係就賣返比綠表客，一係就即刻科水補地價「買斷」個業權！但係補地價講緊嘅係，一要full pay唔可以分期月供；二要按現時市價乘折扣率去計個差價，如果折扣率係30%，當年市價係$100萬，當年要補$30萬；今日市價係$400萬，就要補$120萬！嘩，唔講真係睇唔出呢個「小股東」嘅投資回報係咁好o架XD

明白咩係補地價，之後就要明白補咗地價同未補地價有咩分別！好多人都以為居屋 (仲有已出售嘅公屋) 只可以賣比綠表客，其實已補地價嘅居屋係可以晌自由市場放售，即係賣比任何人。因為已經同政府「買斷」，所以唔會再有任何轉售限制，即係係話，其實同私樓買賣冇分別！既然冇分別，咁點解價錢仲會差一截？質素、地點、設施、管理……樣樣都係錢嚟o架嘛！

早兩日有人晌科林問過一個奇怪嘅問題︰點先睇得出邊D係補咗地價嘅居屋、邊D係未補地價嘅居屋？答案就係，睇唔出！有D嘢呢，係唔慳得嘅，所以呢，一係自己去查冊，一係就經地產搵樓，地產想收你佣就一定幫你check，佢會話比你知邊D係補咗邊D係未補；不過而家好多地產舖門日果D廣告已經會標明係「綠表價 / 自由市場 / 已補地價」，連Q&A都慳返。

仲有一個可愛嘅問題︰綠表客可唔可以買已補地價嘅樓？答案就係，梗係可以啦，話明係自由市場嘛！不過，綠表客一買樓就要交還公屋，既然都係要買樓，點解要揀貴嘅已補地價公屋居屋，而唔揀平嘅未補地價公屋居屋？

講開未補地價居屋，順便提吓佢哋嘅按揭問題。政府會為綠表買家做擔保，所以綠表客最多可以做到5%首期上車。聽落好似好荀，但仲有一樣唔係咁多人知嘅「荀」就係，政府只會為綠表買家提供30年擔保，不過呢30年，係以一手成交日開始計算！聽到呢度，可能有D人仲未明白有咩問題，而答案就係，銀行批居屋按揭年期，係絕對會考慮呢30年擔保！未補地價居屋，還款期係30年減樓齡 (以前曾經聽過係25年減樓齡，但而家普遍都係30年減)。如果你係買新落成居屋 / 居屋樓花，例如早一兩年嘅綠悠，就當然冇乜大問題啦；但如果你係諗住買二手居屋呢？咁你就唔可以揀樓齡太大嘅樓，如果唔係分分鐘供唔起！點解？假設你要借$100萬，現時息口係2.15%，分30年還，每個月就要還$37XX，但如果銀行只批20年，咁你每個月就要還$51XX，15年嘅話就係$$65XX！借$100萬，30年、20年同15年都差咁遠，如果借$200萬，買D 20年未補地價居屋，咪分分鐘供成萬二三蚊一個月？係呀，唔係點解愈舊嘅居屋就愈冇市場喎，如果我供得起萬二三蚊，不如我去買私樓啦，起碼轉手容易好多丫嘛！

綠白表

早幾日晌某科林睇到有人分享買樓經驗，點知有人出嚟話綠表買樓有咩好分享，然後引嚟一班人狂插……其實有好多人都仲係搞唔清楚白表同綠表、公屋居屋同私樓有咩分別。

鬼咩？政府政策一時一樣，而家又冇居屋抽，根住仲要整多個白居二出嚟……之後D後生仔急住買樓但係又未經歷過抽居屋年代，點識分乜嘢打乜嘢丫。連我呢個樓市下的小師奶，都發咗十幾年夢 (不過我未夠二十歲就已經學人發夢買樓XD)，先知道白表綠表有D乜嘢分別。

其實綠白表呢個問題，只要上網search一下，就已經有答案，仲要係房署official website，但係晌呢個互聯網年代，仍然有好多人懶得做功課，真係抵打！
http://www.housingauthority.gov.hk/tc/home-ownership/surplus-hos-flats/eligibility/

簡單講，住緊公屋果D公屋租戶就係綠表，佢哋買咗樓之後要交返間公屋出嚟比政府。而所有唔係綠表嘅人事，而又合乎指定收入資產等等要求，就係白表。簡單講，如果你父母係公屋戶主，佢哋就係綠表；而你如果想自己出嚟買樓，而又合乎指定要求，就係白表。

知道咩綠表白表，之後就係要識得分市面上有咩樓可以買賣。公屋、居屋、夾屋、私樓、村屋……當中政府搞嘅公屋、居屋、夾屋就再細分做已補地價同未補地價，已補地價嘅樓，不論係公屋居屋定夾屋，其實同私樓買賣一樣，冇任何轉售限制，即係所謂嘅自由市場；而未補地價嘅樓，就只可以買比綠表人仕。

講到呢度，又要叉開少少講咩叫白居二。白居二即係「擴展居者有其屋計劃第二市場至白表買家」，即係話果班買家本身唔係公屋戶主，但可以以白表身份 (好似之前所講嘅需合乎指定要求) 買入未補地價公屋居屋同夾屋，待遇同綠表相同，唯一分別就係買完樓之後唔需要交還公屋 (因為本來就唔係公屋戶主，但如果晌公屋有戶籍一樣要除名)。所以簡單講，就係白居二等於綠表，都可以買平樓。不過唔好開心住，白居二只得5000個名額，而且早就過哂申請時間 (2013年初)，你問我政府幾時再搞白居二？點解你唔去問思歪喎？

好喇，今日講住咁多先，下次有機會再講。

媽媽代工系列: 功課花之二

上次講過，而家都唔知係邊個返學、邊個做功課。繼上次年花之後，另一個連公公婆婆都要出手幫忙嘅功課就係——康文署一人一花計劃！

都唔知邊個白痴諗出嚟，要人晌冬天嚟種花，仲要今年嘅花係「新畿內亞鳳仙花」。首先，小學生都知，春天播種、夏天耕種、秋天收成、冬天過冬，邊有人會揀冬天呢D又乾又凍嘅日子嚟種花苗？當然，你可以話香港冬天都唔係好凍 (雖然今年立春之後先反常地低至五六七度)，其實都唔會太難種植，但，唔好話去睇wiki，連康文署自己份powerpoint都寫明「植株適宜在溫度20°C-27°C的環境下生長」，我真係諗唔到香港嘅冬天有幾何有20°C以上囉！

溫度都唔緊要，因為屋企都仲可以開暖爐，但種鳳仙花另一個要求係「須日照充足及適當的温度」！日照？我媽同我屋企都向西北，夏天就話會西斜四點曬到七點啫，冬天去邊度搵西斜？所以最後，學校派果棵苗一個月左右就死咗喇orz

棵苗都死咗，咁去邊度搵功課交？雖然老師話唔一定要交，但係作為一個唔想仔女有欠交功課記錄嘅媽媽嚟講，梗係想幫子女盡量完成功課啦 (講到呢度，我先記得我個仔得3歲咋！點解3歲就要學種花？！)，唯有叫晌屋企做管家嘅公公去買過棵苗啦！功課花果然名不虛傳，因為花墟D舖頭真係寫住「功課花 / 交功課」而唔係「新畿內亞鳳仙花」，吹脹！睇嚟根本就預咗好多人都會種死！

買番棵九成似嘅花，之後梗係要小心種啦！今次就由晌屋企做管家嘅公公日日拎棵花落街曬太陽，真係出心又出力，唔該哂！然後日子一日一日咁過，到最後要交功課嘅日子……當然唔係淨係交番棵花返學校咁簡單啦，仲要做報告呀！嗱，講到呢度，我又記起我個仔得3歲咋，真正嘅字都唔識多隻，你叫佢做report？呢D時候咪又係做阿媽嘅出手囉！！

好彩我都做慣功課 (多得top up degree course，每科都要做一份三千字essay / report，仲要係英文！)，幫小朋友做report，只要求其key D可愛公仔，print幾張相，打幾隻字 (仲可以揀font 20)，做埋個封面就搞掂，連summary、content、conclusion、recommendation……都唔駛，真正小學雞程度，冇難度！最重要反而係要去買個有骨folder入起份report，因為屋企冇打窿機XD

你話丫，搞到咁大，呢份功課點止係媽媽代工丫，直頭係全家總動員呀！

十九年一遇．情人節兼元宵節

天寒地凍，又湊住阿仔，唯有響屋企煮啦

暖爐

暖爐真係冬天嘅好朋友！

之前住沙田，雖然屋企兩邊大窗兼向東向北，但由於屋細 (一房一廳，實用3XX平方呎)，所以一部充油式暖爐已經好夠用！

後嚟搬咗去service apartment，因為向東，雖然地方大咗好多 (6XX呎)，但從來未開過個暖爐！

而家馬鞍山新居，三房一廳，隻隻大窗都係向西北，凍過沙田果陣多多聲！連我老公都忍唔住，出動早幾年晌公司抽到嘅陶瓷暖風機坐陣廁所！真係好彩上次搬屋冇送到比人咋XD

上兩個月，老公抽起條筋話獅子信用咭買冷暖風機有折，又話呢樣好果樣好，又話屋企唔夠風扇，blar blar blar……其實就係購物症發作！好啦，過年前終於收到貨，之後新年一直都係廿幾度，老公件新玩具完全無用武之地。點知一過完立春，天氣反常，一跌跌到落六七度！哈，老公件新玩具終於可以名正言順坐陣大廳！

屋企一時間有三部暖爐，老公即刻笑話我好買間咁大嘅屋，搞到屋企咁凍orz！而家我一放工就開廳果部冷暖風機、阿仔瞓覺又開埋房果部充油式暖爐、沖涼又開埋廁所果個暖風機……我諗起今個月嘅電費就真係笑唔出喇嗚嗚嗚～

家吓終於明白點解買樓要買向南樓！因為夏天唔會西斜，冬天唔會食西北風，電費慳唔少呀！

講返轉頭，成日都有人問，充油式暖爐同陶瓷暖風機有乜分別，等我呢個兩樣都有嘅用家講吓啦！

充油式暖爐暖得慢，但因為唔係吹風，所以唔會吹到個人好乾！不過開得耐會有一陣油臭味，所以我開充油式暖爐會開個快暖模式 (內置吹風)，咁就會暖得快D，同埋冇咁大陣味。另外充油式暖爐細極都有番咁上下size，所以一般設計都係有轆，可以周圍推但切忌唔可以平放 / 倒轉放。仲有就係，因為都有番咁上下size，所以冇可能放入廁所沖涼用。

陶瓷暖風機同充油式暖爐相反，因為係吹熱風，所以吹得太耐皮膚會好乾！但正因為係吹熱風關係，所以比充油式暖爐熱得快好多，又唔會有陣油臭味。另外陶瓷暖風機size有大有細，細嘅放晌廁所沖涼用就啱啱好，而且收藏容易。

至於我老公件新玩具，其實同屋企部陶瓷暖風機差唔多，不過大部D、stylish D、風力勁D、function勁D (可以無線搖控)，貴DDDDDDDD……最緊要係，我老公自我感覺良好D XDDDD

炫耀是福

過年，又係一年一度家族大聚會嘅日子。由於啱啱搬咗新屋，大家都好似好期待去我屋企參觀咁。而我奶奶，早就急不及待自己約齊人嚟我屋企，仲分咐我去酒樓訂一圍枱食飯，同埋提我買定嘢飲招呼人客。

我早就通知我媽奶奶嚟gathering，而佢又咁啱得咁橋約咗我姨媽同一日打牌，於是佢就一早打嚟，問好我奶奶幾點到，然後再早我奶奶少少、帶埋姨媽上嚟我屋企坐坐。

其實，呢D日子，除咗係family gathering之外，仲係show off 嘅大日子。Show咩？Show下間屋有幾大、裝修有幾豪、份禮有幾大、行頭有幾勁、餐飯有幾多山珍海錯......其實都唔及show兒孫福！試問大家，幾歲開始冇再跟屋企人去拜年？如果做阿媽嘅拖兒帶女去拜年，就代表仔女聽話孝順，咁帶埋心抱孫仔浩浩蕩蕩咁去拜年，就更加證明到自己幾有面子；再如果可以帶埋班親戚去D仔女屋企、兼當正自己係女主人咁招呼客人，就絕對係頂級有face！

我唔介意借間屋比阿媽或者奶奶show幸福，話唒都係一年一次啫。如果可以響呢D大日子幫老人家塊面貼金，佢有face時，我又可以得到一個孝順、有本事嘅美名，何樂而不為？

有得show，絕對係老人家之福也！

祝大家新年和氣生財！！

馬年快樂

祝大家馬年

馬上有錢

馬上有福

馬到功成

恭喜恭喜！

又係時候準備過年

......兼一年一度燒銀紙時間orz

扮．中產．Lifestyle

時間︰晚上十一時

地點︰屋企

人物：我老公&我

零食櫃

搬屋之後，地方大咗，老公嚴正聲明一定唔可以再響餐枱放雜物，於是就響廚房留個空間安置所有零食......

果然，

1）將零食收埋響唔當眼嘅地方=零食唔存在

2）當零食唔存在嘅時候=要入貨

結果就係

將食物收埋響唔當眼嘅地方=要入貨=>愈買愈多orz

呢個新年應該唔駛再入貨了，呵呵呵~

媽媽代工系列: 功課花之一

而家都唔知係個仔返學定我返學、個仔做功課定我做功課！

學校出咗通告，要做親子手工拎去年宵義賣，題目係年花。

唉，親乜嘢子丫，咪即係叫家長做囉！

不過，我都好多年冇摺花喇，屋企又冇哂工具，唯有走去買過哂D手工紙呀、鐵線呀……仲上咗 Y●utu◆e 睇摺花教學短片！

原本諗住黐個花牌，仲整咗幾日架喇，後來發覺個效果唔match，要放棄。搞到最後一晚先還完基本步——摺一紮花！

完成品

係唔靚架喇，不過都未致於樣衰，算啦！不過，我真係好有衝動，叫老公去年宵攤位「買」返呢件「作品」返屋企囉orz

p.s. 本文題目係《功課花之一》，當然仲有二步曲啦，搵日再講

抵？唔抵？

尋日又晌某科林見到一個出租POST

此POST一出，大家嘅反應都係——租公屋都要過萬？！

但係出面個市又係點呢？

真係唔係講笑，晌馬鞍山租個細單位，閒閒地都要過萬！市中心有大形商場就更加唔駛講，萬一二起跳！計返頭POST果個公屋租盤，其實呎租真係平過私人樓 (平少少咁啦XD)，不過……公屋嘅居住環境、設施、鄰居……呢個價錢，有得揀，我都唔會揀租公屋囉！

但係，重點其實都係——當你隔離左右都只係交緊千零二千蚊租比政府嘅時候，點解我要比萬幾蚊租同一質素嘅單位？

難怪有人搭嘴，話間屋鑲金啦XD

睇完呢個POST，我真係愈嚟愈覺得之前租service apartment抵到爆，貴又唔係貴好多，但係又有club house又有shuttle任玩任坐，最緊要係燒隻燈膽塞個廁所都有人幫你搞掂 (重點係唔駛另外比錢XD)！真係唔係講笑，我住咗一年，最少佢叫換過4次燈膽、通過3次廁所、1次浴缸，仲要大部分都係call完一兩個鐘就上嚟搞掂，快到冇朋友！如果租人樓住，你試吓叫個包租公買埋燈膽上嚟幫你換，又或者拎個廁所泵上嚟幫你通廁所，你睇佢會比咩反應你？

Club House

以前住公屋居屋，覺得人哋屋企有club house，層樓一定係好貴~

之後自己買樓，屋苑冇club house，覺得點都要買一間屋苑有club house嘅~

然後住service apartment，有club house，facilities 任用，覺得勁正~

再之後終於買到層樓，屋苑有club house嘅，發覺……其實咪又係咁……

可能真係比service apartment寵壞咗！以前住service apartment，會所開朝七晚九，分三節，中間有清潔時間，可以上網、睇報紙、做gym、跑步、游水 (唔係全年開放)、焗桑拿、坐按摩椅 (雖然長期都有人用緊)、兒童閣，仲有K 房同麻將房，全部唔駛錢任用 (租金包埋)。但係而家新居club house，真係同以前service apartment係兩個世界！雖然都仲可以上網、睇報紙、做gym、跑步、游水 (唔係全年開放)、焗桑拿、仲可以book羽毛球場、壁球場、高爾夫球場、跳舞室、桌球室，但係樣樣都要另外收費！！最大鑊就係你要首先比年費去開通你個club house membership，仲係以「人」而唔係「住宅單位」去收費！等我哋仲好天真咁以為係管理費包埋任玩任用添！比membership都唔緊要，不過其實club house收費唔係特別平，以游水咁講，去公眾泳池都係$19，去club house游都係呢個價，街外人仲要係再收貴D！唔通真係貪晌club house游水冇咁迫人？

D人成日都話，住service apartment呢樣唔好果樣唔好。係，住service apartment煮飯係超困難 (搵日再講)，但係facilities真係任用，連游水都係晌同一building內 (冇錯，只係搭客lift落2/F！)，隨時著住bikini拎住住客證晌屋企行落去游水都得！如果住屋苑呢？你首先要落大堂，再行一段路去club house，登記完、比埋錢先可以入場游水！行咁大段路，唔好話淨係著bikini丫，比你披多條毛巾，你都唔敢行出屋企門口啦！

老公都話，而家屋苑個club house，同以前service apartment個club house，真係完全冇得比！不過都唔可以咁講嘅，屋苑club house定期會搞跳舞班、壁球班、跆拳道班、粵曲班、游泳班，晌屋企樓下上堂就得，點都方便過你去報康文署嘅course啦，只係我同老公都對果D course冇興趣啫~

咦，既然membership fee又比咗，冇理由唔用佢D facilities！一於夏天日日落去睇報紙嘆冷氣先 (不另收費) XD

終於有家的感覺

忙咗一輪，終於叫做搬好屋 (雖然仲有幾箱嘢未unpack，堆哂晌阿仔間房度)。住service apartment同住自己屋企真係兩種感覺，因為呢度所有嘢都係我真金白銀買、落足心機整嘅，唔駛好似住酒店咁樣樣嘢都好似唔係自己嘅咁~

仲有最開心就梗係可以日日接返阿仔返嚟瞓覺覺豬啦~

不過就要辛苦我媽每日一早就落嚟湊走仔仔，夜晚又等我收工再湊仔仔返過嚟~

點都好，之前咁辛苦由沙田搬返入馬鞍山，都係為咗阿仔，而家總算settle好哂。而且地方又大咗，大家活動空間又多咗，所以最少可以晌度stay幾年喇 (喂，SSD都要鎖3年啦！)