又來小學雞笑話一則

鳴謝婆婆提供笑話~

(阿仔份數學功課)

試比較一下，紅色、藍色、綠色顏色筆，哪一支最長？

天真嘅小朋友，竟然走去拎書包盒木顏色出嚟，搵紅、藍、綠色三支筆出嚟度 orz

仔呀仔，你睇哂條題目未架？人哋本書右邊幅圖有比提示架！(紅色比藍色長、藍色比綠色長)

期中考試之迫娘為虎

唔覺唔覺阿仔已經開咗學差唔多三個月，渡過咗9月嘅蜜月期（成日冇帶書冇帶功課、抄錯手冊、拎錯同學仔嘅嘢返屋企……）、10月嘅適應期（默書、小測），終於嚟到11月嘅期中考試。

唉，都唔知係咪學校要決心洗甩「多功課」嘅污名，定係而家已經唔再興抄書，叫個仔溫書抄課文抄詞語仲慘過叫佢去死……因為學校都冇乜要抄寫嘅功課！另一方面，阿仔又出咗名心急兼懶散，所以叫佢抄書就一定要講數講數再講數……字已經寫得樣衰，仲要hea抄，再加上老公把衰口話而家唔駛識寫字（真係想打爆佢個咀），搞到個仔成日都唔肯同我寫字！！

好啦，冇心溫書加上個腦死實實唔試轉彎，都預咗考得唔荒好架啦。派卷返嚟……中文、英文、常識都比老師扣錯字分，所謂嘅錯字咪就係D字樣衰比人扣分囉（個大階寫得唔夠大似細階、個逗號粒豆豉冇寫好，似多條尾嘅句號……），你話火唔火丫！

中、英文卷一考得唔好我預咗（事實都只係得82同78分），但係，中文listening肥佬返嚟……

唉，小一就已經肥佬，我真係接受唔到囉……

都唔知點解個仔脾氣似我咁臭，但係讀書就唔似我咁醒（我小學真係唔溫書都科科9X分，年年考全級頭10名架）……

都話冇付出就冇收穫架啦，成日淨係要打機睇電視，但係又冇成績比我睇到，咁我真係好難唔做虎媽架喎。老公又成日唔緊唔緊個仔D成績，睇怕真係擺明要我做衰人，日日鞭打策個仔讀書啦orz

輕芝士蛋糕（電飯煲版）

作為一個職業媽媽，開焗爐呢D咁大工程嘅嘢就梗係可免則免啦！但係，如果想食芝士蛋糕，但又唔想開爐、唔想睇火咁又點呢？一個西施電飯煲就幫到手喇。

材料：

忌廉芝士 cream cheese block　125克

牛油　　　　　　　　　　　　30克

鮮忌廉 whipping cream　　　　100毫升

砂糖　　　　　　　　　　　　20克

蛋黃　　　　　　　　　　　　2隻

蛋白　　　　　　　　　　　　2隻

檸檬汁（可用白醋代替）　　　數滴（可不加）

雲呢拿油　　　　　　　　　　2滴（可不加）

低筋麵粉　　　　　　　　　　8克

粟粉　　　　　　　　　　　　8克

做法：

1. 忌廉芝士及牛油以熱水座溶

2. 加入鮮忌廉、蛋黃、雲呢拿油及15克糖，拌勻

3. 低筋麵粉及粟粉過篩

4. 將麵粉加入芝士溶液中，拌勻

5. 將檸檬汁加入蛋白，以打蛋器打成泡沫狀；然後分2次加入剩餘5克糖，並繼續發打蛋白至企身

6. 分2-3次把蛋白加入芝士溶液中，並輕手拌勻

7. 把蛋糕溶液倒入電飯煲中，並按煮飯鍵

8. 當電飯㷛由煮飯模式變為保溫模式之後，按 reset 鍵重新煮飯。重複2次（即共煮3次）

9. 把電飯㷛內膽連同蛋糕放入雪櫃雪1小時，以便脫模

心得：

1. 檸檬汁（白醋）可令蛋白更易打起並且不易下塌，但沒有加也不會影響味道

2. 雲呢拿油可辟除蛋腥味，但落太多反而會蓋過芝士味
3. 想蛋糕更滑身無粉粒，可以在步驟(4) 之後再過篩一次，才加入已打起的蛋白
4. 可用牙籤刺下蛋糕，如沒有濕漉漉的蛋糕溶液黏附著就代表蛋糕已熟
5. 蛋糕溶液最多只可到飯㷛內膽1/2高，要預留空間給蛋糕發大

我個2人用（最多煮4碗飯）電飯煲前後煮咗30min+30min+30min=1.5hrs，快唔快就見人見智啦，不過就肯定唔駛睇火唔駛怕傳統隔水焗會乾水或者蛋糕面焗燶XD

另外就係一定要用西施煲（即係不沾內膽、煮飯無飯焦果種），如果唔係一定黐哂底（上次貪內隴細試過用阿媽寄放我屋企嘅一人hand carry飯煲，明明話係不沾內膽，但最後黐到甩唔到煲orz）

仲有就係可以用同一條recipe，以乳酪（yogurt）代替忌廉芝士，再減少少鮮忌廉份量，一樣可以整到好好味嘅乳酪蛋糕（電飯煲版）架！

小學雞笑話兩則

話說有日我媽叫阿仔做補充練習……

填充題（任填、無字揀）

__ 人　（開放式題目，參考答案為「男人 / 女人」）

阿仔諗咗好耐都諗唔到填乜嘢字先配到詞語。

我　　　︰「有D咩人呀？你成日發脾氣鬧我果D呢？」

仔　　　︰（忟）「諗唔到呀。」

我　　　︰「有D咩字成日形容人嘅呢？」

仔　　　︰（諗咗一陣）「我知，蠢人！（懶醒mode）」

我＆我媽︰（爆笑XDDDDDDDDDDD）

其實，我一心諗住guide佢答「好人」「衰人」咋，點知阿仔無啦啦就爆句「蠢人」！最蠢就係佢答咗都唔識寫嘛……寫好人咪好囉，一定識寫先嘛！

------------------------------------

呢一日，到我同阿仔做補充練習……

造句題，用詞語「可愛」造句子

仔︰「妹妹很可愛。」

我︰「咁你識唔識寫『妹妹』兩隻字先？考試要寫識寫嘅字先得架。

　　　如果唔係，唔寫、或者寫錯字就會比老師扣分架喇。」

仔︰「咁寫『媽媽很可愛』啦！」

我︰（無言）

仔呀仔，阿媽知自己天生麗質，係靚女一名，不過靚女唔係用「可愛」嚟形容架嘛XD

又係爛gag一則

話說阿仔自細就氣管差好易咳，一咳就好易咳到嘔，仲要係堅嘔哂成餐飯出嚟果隻。以前BB一齊瞓果陣，佢瞓著一咳，我哋一定比個盆佢，等佢唔駛嘔到成衫成床都係 (我有多次半夜洗被洗床單嘅經驗orz)。而家佢大個DD，自己瞓一間房，但係佢一病，尤其係咳，我呢個做阿媽嘅，仍然會陪佢瞓過夜，為嘅就係幫佢遞「嘔吐盆」……

陪瞓，絕對唔係一件優差。第一，要花時間，因為唔知個仔幾時先瞓得著。第二，要花精神，如果講故事嘅話要講兩句解釋一句、仲要答問題；唔講故事就要pillow talk、一講就可能由老師同學講到祖宗十八代……。第三，要花體力，因為阿仔成日都好鍾意成個人碌上我度 (陪瞓員係瞓子母床下格)，又成日要我拍佢瞓。有時真係陪瞓陪到自己都瞓著埋，瞓到半夜又要爬返過自己間房瞓架！

老公成鬼日覺得我陪個仔瞓好爽，其實最爽係佢就真！因為冇人阻住佢晌個廳到打機睇電視！呢樣都唔算，最爽嘅就係……

我　︰你就好啦，一個人瞓哂一張床。我同阿仔瞓，張床又細又硬又迫！
老公︰我一樣好「迫」喎。
我　︰你迫乜鬼！一個人瞓五呎床！
老公︰咩唔迫呀！B-I-G，BIG！

頂！

佢就真係BIG得過癮喇，難為我迫晌張兩呎床，仲要隨時比人伸兩腳，嗚嗚～～

梅蜜

除咗海梅酒之外，我同時間醃咗樽梅蜜。梅蜜同梅酒嘅分別係一個係醃 (梅蜜)、另一個係浸 (梅酒)。梅蜜完成會有淡淡酒味 (發酵作用)，最啱用嚟加梳打水，製成夏日特飲，正！

醃梅蜜，材料比例大概係1kg青梅︰0.3kg蜜糖︰0.2kg冰糖。都係果句啦，口味呢家嘢各有不同，你可以落多D梅、少D糖，但係蜜糖唔建議太少 (如果唔係邊有蜜糖味orz)……最緊要你有冒險精神 XD

另外，醃梅蜜秘訣

1. 糖最好用冰糖或者冰晶糖
(白糖經過精煉同漂白，唔啱浸酒用)
2. 青梅一定要洗淨、挑蒂、風乾
(有冇用鹽捽我覺得分別唔大，反而捽完D梅仲快黃咗熟咗)
3. 一定一定要用玻璃樽
(我唔想D製成品食落有膠味鐵味丫orz)
4. 所有容器一定要消毒
(蒸同烚嘅話一定要風乾，如果想懶就用酒精抹下)
5. 買樽之前記得要計清楚個樽可以裝幾多liter，然後所有材料加埋唔可以超過容器嘅70%
(醃梅蜜過程中D梅會浮起同發酵，要預番位比佢浮同發酵)
6. 最好浸果陣已經分埋瓶。即係浸兩樽1 liter好過浸一樽2 liter
(浸完先分瓶一樣要消毒，而且預先分瓶可以分散風險，避免攬炒)
7. 因為本身冇加入酒，所以唔好成日開蓋，以免發霉
(梅蜜變咗霉蜜，Oh No！)
8. 出水係正常，放心放心。但係如果D水混濁到幪查查咁就係變壞，唔要得！
9. 當然臭咗都即係變壞，唔要得啦！

做法︰
1. 先放青梅、蜜糖，關好蓋
2. 一個星期後加入一半份量嘅糖，關好蓋
3. 再隔一個星期，加入剩下一半份量嘅糖，關好蓋
3. 醃4個月左右就OK

我呢樽嘅份量係梅蜜糖 1kg︰0.4kg︰0.1kg，因為我落多咗蜜糖，所以冰糖都冇分兩次落，一次過落哂就算，以免開得蓋多發霉。呢個份量其實都幾甜，所以最好係溝梳打水，咁先可以飲到梅蜜嘅甜味。

梅酒

話說4月果陣，行過生果檔，見到好多又平又靚嘅青梅賣；同時，又晌網上見到好多浸梅酒嘅post thread。眼見$20兩磅青梅加$30一支酒，成本唔係十分高啫，於是又學人試吓浸梅酒先。

睇過好多網上食譜，比例不外乎係2 liter酒︰1kg青梅︰0.5kg糖。當然，口味呢家嘢各有不同，你可以落少D酒、多D梅、多D糖……最緊要你有冒險精神 (即係成品有幾難食你都會食哂佢XD)

另外，浸酒秘訣係

1. 酒精成份最好係30%以上，咁先可以抽取到最多青梅嘅梅味。不過15-20%都可以一試。

(Osmosis，以前讀Bio一定聽過呢個terms，不過唔好問我點解XD)

2. 糖最好用冰糖或者冰晶糖

(白糖經過精煉同漂白，唔啱浸酒用)

3. 青梅一定要洗淨、挑蒂、風乾

(有冇用鹽捽我覺得分別唔大，反而捽完D梅仲快黃咗熟咗)

4. 想D青梅出味D，浸之前可以用刀輕輕「界」兩刀。不過唔「界」都冇問題。

(不過「界」咗，完成品D梅會冇咁靚仔)

5. 一定一定要用玻璃樽

(我唔想D酒有膠味鐵味丫orz)

6. 所有容器一定要消毒

(蒸同烚嘅話一定要風乾，如果想懶就用酒精抹下)

7. 買樽之前記得要計清楚個樽可以裝幾多liter，然後所有材料加埋唔可以超過容器嘅90%

(最容易出事就係買個2liter樽但係同時買咗1 liter酒+2磅梅，之後冇乜位落糖 <-即係我)

8. 最好浸果陣已經分埋瓶。即係浸兩樽1 liter好過浸一樽2 liter

(浸完先分瓶一樣要消毒，而且預先分瓶可以分散風險，避免攬炒)

9. 糖可以一次過落、後落 (1-2個月後)、又或者分兩次落 (平分兩份、隔一個月落一次)

(糖愈遲落，完成品粒梅就愈飽滿；相反粒梅會縮水巢皮。不過呢D係外觀問題，唔影響味道)

呢兩樽細嘅酒係好隨意咁浸，酒梅糖嘅比例係2︰1︰1、用咗19%韓國燒酌。

屋企仲有一樽大嘅 (冇映相)，比例係1︰0.7︰0.4 (咪就係計錯容量囉 orz)、用咗1 liter 29.5%三蒸酒。

講咁耐，浸咗4個月，適逢今日中秋，奶奶話拎少少過去試吓，就等我試頭啖酒先啦XDDDDDD

Label機

每逢開學，家長一定要做嘅嘢就係幫小朋友嘅書本文具寫名，目的當然就係為咗方便唔見咗果陣容易認領啦。只不過，當老師要求每支鉛筆、顏色筆、每把簡尺、每舊擦膠、每個膠file都要寫名嘅時候⋯⋯講緊嘅係隨時有三五十件物品等住家長寫名，你都咪話唔嘥時間唔嘥手力。

以前我讀書果陣，屋企人買咗個dyxx機返嚟，我哋就係咁用嚟打名，不過一來只可以打英文、二來條label係凸字，又易甩又易刮花，所以玩咗幾年就放棄咗。

而家科技進步，label機已經真係出一條條label，而且仲可以出中英日文數字符號標點公仔樣⋯⋯真係user friendly到極。最重要係，label顏色多，紅橙黃綠青藍紫金銀黑白透明底襯黑白藍紅字⋯⋯真係你講得出嘅都有，掂。

呢部機係四年前書展嗰陣買嘅，$500有找，用咗幾年都仲係好新淨，堅係超值抵用啦！

真係計印相printer之後，又一件學生家長必備嘅文儀用品。

早餐

九月，阿仔終於成為小學雞。由以前九點起身、嘆住慢板刷牙洗面食個brunch、再睇埋十二點新聞先換衫返學；到而家七點比人剷起身，打仗咁刷牙洗面食個包、再禽禽青換衫著鞋比人拖住出門口⋯⋯唔好話小朋友要適應，連我呢個做阿媽嘅都一樣要改變生活習慣，早半個鐘起身，再要幫個仔準備早餐。

朝早返工返學大家都趕時間，唯一方便快捷又有營養嘅早餐就係三文治。但係，食得多芝腿治係人都厭啦！咁點算？花多少少心思，就日日都有唔同口味嘅飛碟三文治啦XD

小一派位之塵埃落定

小一統一派位結束，而家正係各位家長盡最後努力叩門嘅日子。好彩同感恩嘅係阿仔入到第一志願，我呢個靚媽可以响放榜當日10:00拎到結果之後，就收工返屋企「補眠」；不過阿仔就有同學仔派得唔好，要周圍叩門喇。

今年MOS 89網多咗穩陣派家長，所以有舊年講明乙二都穩入嘅「次熱」學校，今年有家長揀佢做乙二都唔入。

另一方面，仍然有唔識玩派位遊戲、又或者係填表過份積極（俗D講句就係唔認清現實）嘅家長，乙一乙二乙三都揀大熱學校，最後乙一派唔到就直接落到乙四五六七、甚或根本冇揀過嘅學校！

要知道隨機冧碼先定後係by luck，如果你响全港30000名參加統一派位嘅學生當中排頭幾位，咁你當然甲一已經直入啦！但排頭位嘅機會率有幾高冇人知㗎喎。

好喇，當你甲一甲二甲三都唔夠人揪（抽），下一round玩乙部，同同區約800人（89網）再鬥先後次序喇。如果你排頭50（以各校乙部派位學額而言），咁乙一一定必入啦。但係如果排得後，而你揀嘅乙一又已經派完，冇哂位呢？咁就要等800人都run完乙一，再一齊抽乙二喇喎。以89網而言，熱門果6間今年最少有5間都係乙一就收夠人，所以乙二就一定要放一間自己接受到嘅次熱做保險線，否則最後就落入人人都唔揀嘅所謂寶校（响度我唔評論點為之寶校）、甚至雙非校喇。

放保險線，除咗唔想最後落入非心水學校之外，最重要係唔想最後大人同小朋友都辛苦！派乙二，最多咪叩返甲一乙一兩間學校；但派到強差人意⋯⋯家長帶住小朋友叩三四五六七間學校，由交表、1st in 、2nd in、有D仲有3rd in⋯⋯就算大人心理質素唔差，但小朋友已經差唔多6歲，有獨立思想，一定頂唔順亦唔鍾意有咁多interview喇。

網絡上廣為流傳嘅「明星小一派位」（又或者用keyword search 「小一派位劉xx」)，其實已經好清楚解釋咗小一派位嘅玩法。寄語來年要參加統一派位嘅家長們，為咗自己、為咗小朋友，填表時一定要先了解派位制度、再了解抽獎門檻，咁就可以免除撲學校之苦。

唔懶得、唔慳得

講緊嘅係呢樣

真係想偷懶，唔自己剁蒜蓉都唔得！先唔講自己剁嘅會香D、食到有蒜粒、又冇味精冇添加劑，最麻煩仲要係牌子嘢一落鑊就彈到周圍都係抹餐死！

所以呢，有D準備功夫真係唔可以慳㗎！

爛gag一則

話說，老公今晚瞓落床之後話瞓唔著，我當然好順口咁叫佢數綿羊啦，點知佢話︰「D羊晌度開緊迷幻派對喎。」

咩呀？數綿羊同迷幻派對有咩關係呀？

老公話︰「專家話要諗吓D羊做緊乜嘢嘛！咁第一隻羊就食緊草、第二隻羊就high緊……仲有D fing緊頭……」

頂！

食緊草 (grass) vs 隊緊草 (大麻)

咁樣都比佢諗到，真係笑到我收唔到聲，成個人醒哂XDDDDDD

p.s. 話說某報今日出咗篇新聞稿，電話app個pop up alert標題係《正確方法數綿羊》。內容係乜？自己去睇睇，睇吓幫唔幫到手？

單純vs單純

小朋友嘅思想有時真係好單純。

話說我屋企果位K3小朋友，K1果年拍球比賽(鬥拍得多)拎咗第二名(銀牌)、K2果年拎咗第一名(金牌)；今年K3，佢話佢要拎第三名，儲埋個銅埋齊SET！

阿媽心諗︰阿仔呀，乜你咁鬼冇大志架orz

咁好啦，咁5歲6歲小朋友，個個都已經再唔係一舊飯，而且又勤力練習，身手肯定比之前果兩年大有進步啦。相反，阿仔又懶又衰心急，成日都幾乎拍到甩哂手，咁梗係唔夠人鍊啦！

睇到呢度，係咪以為我一定會做虎媽，會狂逼個仔練習，一定要佢贏呢？

其實我一路都覺得阿仔K1 K2羸到比賽係「符碌」——當然佢都有好勝心，我哋話佢做得唔好，佢會要求練習多一次，不過佢只係一日練兩三次，唔係日練夜練果隻。今年亦係一如以往，一日最多練兩三次，而且婆婆都話佢晌學校都冇練習，但其他同學仔就好勤力練，所以我一早就知佢今年一定冇可能「符碌」羸。果然，比賽結果係三甲不入。

阿仔輸咗點算好？我梗係大聲叫好啦，點樣面對失敗其實都係一門學問。呢個小朋友成日唔想輸，而家趁佢仲細，等佢受小小挫折，等佢知道唔練習就羸唔到比賽，我覺得比佢再「符碌」贏嚟得更有意義。

點知一放學，婆婆SEND VOICE MESSAGE比我，話阿仔羸咗另一組冇名次但係有獎品嘅拍球比賽(5分鐘唔甩手)。

吓？

返到屋企，阿仔勁開心咁同我話自己羸咗有獎品，完全唔記得自己晌另一場比賽輸咗。婆婆都話原本以為佢輸咗會喊，仲買定零食諗住氹佢。唉，我仲一心想佢返嚟喊一餐，等佢學吓點樣輸添架！真係……咁我點教仔啫！

小朋友單單純純，淨係記得D開心事，真係好。

係阿媽太單純，以為你輸咗會唔開心，仲諗定點樣教你一分耕耘一分收穫添。

不過放心，阿媽留番下次再教你點樣面對失敗。

勁多公仔

淨係睇相，係咪以為我有好多公仔呢？

但係，如果我話D公仔唔係屬於我嘅呢？

唔係我，咁係邊個？

如果我話係我個仔嘅，你信唔信？

呢度只係冰山一角咋！仲有一大袋公仔比我放咗落真空袋收埋咗……

唉，其實又唔完全怪得我個仔，因為我媽成日帶佢去學校附近果間便便利店買下午茶，順便夾$1公仔機……日子有功，我媽話佢有時夾三兩次就夾到，咁見到個公仔$1實中，冇理由唔夾喎……

呢兩婆孫真係orz

栗子炆雞翼

呢排公司無野做，日日準時收工，不過老公一樣早收工；所以放工仍然要諗下點樣先至可以用最短嘅時間煮好一餐飯。煎、炒、煮、炸、炆、燉、蒸⋯⋯要用最簡單嘅材料，用最簡單嘅工具，煮最簡單嘅嘢，栗子炆雞翼絕對係方便快捷又好味嘅一味餸。

而家supermarket有好多剝晒殻嘅栗子賣，一pack約半磅都係廿零蚊，用嚟炆雞翼簡直係perfect！

材料：

雞翼          10隻

栗子肉      半磅

𧐢油          一湯匙

水              500毫升

醃料：

生抽          一湯匙

老抽          半湯匙

鹽              半茶匙

麻油          少許

紹酒          少許

白胡椒粉   少許

做法：

1. 雞翼先用醃料醃最少10分鐘（醃肉汁料醃肉後要保留）

2. 栗子剝殻、去皮、洗淨備用

3. 燒紅鑊，用少許油（份量外）略煎雞翼兩邊（不用煎熟）

4. 加回之前的醃肉汁料，並加入水、𧐢油、栗子，用大火煮滾

5. 煮滾後轉小火炆20-30分鐘至肉汁杰便成

p.s. 食得豪D，仲可以加冬菇或者冰鮮鮑魚去炆，個汁仲惹味D，飯都可以食多碗XD

零難度清湯腩

作為一個職業女性，日頭要返工、夜晚要煮飯，趕頭趕命忙到甩哂碌。放工收得早，當然可以慢慢响超市行吓諗吓今晚食乜餸啦；但係如果收得晏，就唯有焗住出街食或者食外賣。唔想餐餐出街食同食外賣，可以點樣？收工煮定第二日晚飯可能係一個好辦法。之但係有乜嘢係可以預早整定又唔怕隔夜難食、兼且又健康、又冇難度呢？

清湯腩——唔識整嘅人可能以為好難整，但係其實仲容易過煎雞翼。只需要兩條牛腩、一個公仔麵煲、適量清水，同埋幾樣簡單香料、加上愛心同時間就搞掂。最重要係乜？早一晚整定前半部份（可以食住飯炆、煲住劇炆、冲住涼炆⋯⋯），臨瞓前放入雪櫃，等二日放工翻炆30分鐘就食得啦嘛！

好似我今次咁，想食牛但係屋企附近果間「品味幫李日日賺」今期新鮮牛腩冇特價，於是去街市凍肉舖買兩條牛𦟌，味道一樣唔輸蝕，仲平D添！

講起「幫你日日賺」，佢哋間唔中會有D pack 好，白色，叫牛爽肉嘅嘢賣。其他地方賣嘅牛爽肉我唔知係咩部位，但「日日賺」果D其實係肥膏嚟，點解我知？因為我中過伏囉 :(

材料：

牛腩            約一斤（切兩件）

（今次改用街市雪藏牛𦟌，$70兩條，差唔多兩磅重）

洋蔥            一個

花椒八角     適量

香葉            2-3片

做法：

1. 牛腩先出水（圖1-2），洗淨。

2. 洋蔥洗淨，去皮、切頭去尾。

3. 花椒八角、香葉冲一冲水。

4. 將以上所有材料放入煲中，加入清水至蓋過牛腩（圖3）。

5. 開火煲滾後改慢火煮15分鐘，關火再焗15分鐘。重覆此「炆焗法」三次（即前後煮1.5小時），放涼（圖4），拿掉洋蔥等香料，放入雪櫃。

6. 隔天把牛腩拿出來，去掉白色油脂（圖5）、切件（圖6），再放回煲中，加鹽，再炆焗一次便成。

秘訣：

1. 牛腩不用預先切細件，以免愈煮愈縮水

2. 牛腩先出水再炆，湯底會較清

3. 洋蔥可用白洋蔥或紫洋蔥

4. 如果手邊有其他香料（如我今次有中式青蔥），也可加入炆煮，味道不會差太多

5. 可利用茶包袋裝起花椒八角，方便炆煮後取出

5. 牛腩雪過夜，更容易去除多餘油脂，切件也更不易散開

6. 想煮蘿蔔清湯腩，可在第二天翻煲時切件一併加入。蘿蔔也是一次炆焗就可煮熟透

赤小豆扁豆煲粉葛湯

呢排D天氣時冷時熱，最麻煩仲係潮濕，日日都相對濕度100%……不論屋企廁所，就連廳、房、屋外大堂、走廊……全部都濕到有水跡，真係濕到人都癲！

屋企濕漉漉就話可以開抽濕機開冷氣機抽濕啫，但係個人都濕到奄奄悶悶咁，又可以點？趁唔駛出奶奶度食飯，留晌屋企煲個靚湯先 ～

鯛魚燒

早幾個月前買嘅窩夫機出咗新底盤，而家除咗可以夾三文治同窩夫之外，仲可以整鯛魚燒同埋冬甩添。

就趁今日放假，又試吓整新嘢先！

材料：

雞蛋          一隻

砂糖          40克

鮮奶          90毫升

麵粉          90克

泡打粉      半茶匙

紅豆餡料  適量

（此份量可做約5件）

麵糊做法：

1. 雞蛋加入砂糖，用打蛋器打至起泡

2. 分兩次加入鮮奶，打至起泡

3. 加入麵粉及泡打粉，輕手拌勻

4. 麵糊過篩

5. 放入雪櫃雪最少30分鐘

秘訣：

1. 麵糊過篩會更幼滑

2. 用唧唧樽落麵糊會更方便、更容易控制份量

3. 先在下模盤加入麵糊（約七成），加入紅豆餡料後再在餡面鋪上另一層麵糊。這時可順便填滿下模盤空隙

4. 雖然K牌機唔建議用家「反機」，但「反機」才會令機面模盤沾到麵糊

燜燒杯焗蕃薯

話說我買咗隻T牌燜燒杯差唔多十年，一路都冇真正研究過點樣用嚟整嘢食，反而當佢係暖壺咁用嚟裝湯裝粥。直至呢三四年興起用象仔焗粥仔整嘢食，我先又再留意吓燜燒杯食譜。

放工買餸見到日本蕃薯仔幾靚，$19.9一袋5小隻。嗯，聽日就食蕃薯仔做早餐keep fit！

不過，以我呢D瞓少陣都唔得嘅性格，冇理由要我朝頭早花15分鐘烚蕃薯架……好，就試吓用燜燒杯整啦！

準備材料︰燜燒杯、蕃薯、熱水 (一定要啱啱煲滾嘅滾水)

1. 蕃薯洗淨 (不用刨皮)，放入燜燒杯

2. 注入熱水，關蓋，焗5分鐘 (暖壺)

3. 倒出熱水，再次注入熱水，關蓋，焗8小時

因為第一次焗，而且我買果D蕃薯比較肥身，所以我焗過夜費事個心熟唔透。如果係瘦瘦長長嘅日本蕃薯，可以試吓縮短D時間。

又係時候補一補

俗語有云：女人唔補好易老。唔覺唔覺又老一歲，係時候對自己好D嘞。

趁呢兩日得閒，又發定D花膠先！

雖然我食果D只係普通cheap花膠筒，但我一樣跟足步驟發，唔會hea做，費事老公嫌腥！

另類feature wall

Feature wall 大家可能聽得多，原本我以為我老公只係高科技電子零件多到可以整「埃pad wall」，點知未整到「埃pad wall」，就比佢先將所有袋吊哂上衣櫃門做「書包wall」……

都痴線架佢！原本諗住佢冇地方放袋，就買兩個勾(真係兩個咁大把) 比佢吊起D袋，點知佢吊上癮兼買完一個袋又一個袋，搞到而家咁……

你話D袋冇用就掉啦？佢就梗係有藉口話D袋成日都用，唔可以收上閣仔。

你話咁多袋仲唔夠咩？佢就梗係有藉口話而家用緊果個袋點點點唔好、新出果個點點點好用（頂，咁你當初又買而家呢個？）。

男人，有錢一樣會買袋，一樣係唔貴唔買，一樣係唔怕買得多、最怕冇錢買。

我老公仲話最好每隻衣櫃門都買隻勾，比佢吊起D袋。頂，我都係得一個返工走佬袋兼要放響餐枱櫈咋！！

小一學位分配

而家做家長真係壓力大，BB未出世就要撲奶粉撲育嬰院、出咗世就要撲幼兒園幼稚園、有幼稚園offer就開始操中英文撲小學、報官津學位嘅仲要搬埋屋搏多個派位機會……

雖然話我唔逼個仔，盡量唔做虎媽，但係唔逼係一件事，想佢入間好學校又係另一件事。

MOS 89校網，得11間揀。6間熱 (多人揀、第一志願先有機會入)，3間次熱 (第二志願穩入)，2間雙非。我冇去哂咁多間學校聽簡介會，不過按我對我個仔嘅期望+方便我媽接送+我個仔嘅能力，最後夾硬填哂11個選擇，但求唔中頭三志願，去到最後機會玩叩門都有D誠意分加吓。

朋友聽到我講話咩熱、熱、熱、次熱……好似買馬咁。事實上派位仲衰過買馬！買馬唔中都仲可以怨自己眼光差，派位派得差真係唔知怨邊個好！而且派位呢條飛仲要等到六月先有派彩結果，過年過節圍埋一齊實比三姑六婆問長問短 (事實上連由細到大都冇理過我讀書讀成點嘅老豆，都問我媽，我幫我個仔交咗表未)，真係心理質素差少少都頂唔住。

嗱，講明先，以下純粹本人選擇，絕無參考價值。如閣下參考本人選擇而導致名落孫山，本人恕不負責XD

又係一年一度功課花

而家做阿媽真係要十項全能，唔識唔得都要頂硬上，真正嘅「點都幫你度掂佢」。

親子功課年花擺設，唔想又交行貨，唯有動吓腦筋、上網自學、再加D創意、加D環保原素⋯⋯

登登登櫈，年年有魚(餘)，插到成盤花咁，算係咁喇卦？

有得睇冇得駛

咩叫慘？冇錢夠唔夠慘？冇飯食夠唔夠慘？

而家又多一樣慘事，就係有得睇冇得駛！點解？咪就係當你年尾出咗糧、仲要係雙糧，老公又用ebanking出咗家用比你，但係當你拎張提款卡去櫃員機撳錢，你一個仙都拎唔到……

真係講哂&*%^&#$!%

好彩撳錢果陣係星期六朝早，又係晌銀行隔離，CS姐姐又好好人嗱嗱聲幫我對身份證出新卡，唔駛我排隊搞 (排成30人架，頂！)，如果唔係真係講半個鐘$&*#(^#*都發洩唔到我果團怒火呀。

話時話，而家D銀行真係愈嚟愈討厭，你cut到成個馬鞍山得番一間分行，counter又少，成鬼日叫人用ebanking用櫃員機，但係D晶片卡又容易壞(我媽上個月又係壞卡撳唔到錢，又係呢間銀行orz)，咁樣對D唔係成日得閒去銀行嘅用戶真係好唔方便囉。

新卡，又要等四個working days，銀包又冇錢，真係唔知點算好:(

一人份的燉盅

唔知係我老公呢排財多丫、定係真係D病菌太勁，佢由感冒到轉咳，足足病咗兩個星期都未好番orz

傷風感冒，我就幫唔到幾多喇。不過對付咳呢，話哂我經驗十足，真係醫唔到，都可以用湯水幫補下。

不過今日唔講湯水住。如果屋企平日連飯都好少煮、湯就更加唔點煲嘅人，又點樣可以日日煲一人份量嘅湯呢？答案就係——一人份的燉盅。

唔好睇少呢個電子燉盅，我佗住阿仔果陣，我媽買比我嘅，用意就係想我日日自己燉補品食。不過到阿仔出咗世、我坐完月之後，佢仍然有其他任務︰燉一人份量粥仔、燉一人份量飯仔、燉一人份量補湯、燉一人份量糖水……基本上佢一路都冇停過。點解？咪因為「一人份量」，容易計份量，唔駛其他人「陪食」或者食隔夜囉！

電子燉盅同傳統燉嘢食一樣，都係隔水燉。不過因為係無火煮食，所以唔駛好似傳統燉嘢食咁，隔一個鐘去加水、同埋成日驚佢煲乾水。

另外，好多本地品牌都有出電子燉盅，用起上嚟都大同小異，所以買果陣，最緊要係啱自己心水。

好似我呢個電子燉盅咁，容量都有500ml，湯連渣有成一碗滿即食麵碗份量，真正一人份量。佢有另一個好處就係乾水自動斷電 (放心，我試過呢個function，真係work嘅) ，所以絕對唔怕煲燶水燒著咗個廚房XD

雖然個煲身有刻度寫住 (燉) 1-5小時，不過我好多時都係放多過5小時用嘅水，總之就係唔會滾起濺哂出嚟就OK。但係要留意，外邊放得愈多水燉，就即係要用多少少時間先會開始水滾。

如果好似我咁，日出而作、日入而息，中間有成十二個鐘唔晌屋企，又唔想放太多水咁點好呢？嗱，本身個電子燉盅呢，就冇timer呢個function，不過只要自己加個機械式定時器，就可以set幾時開始煮都得喇！至於機械式定時器，去一般買插頭拖板嘅電器舖就有，五六十蚊就有交易。

講番轉頭，呢個電子燉盅，我屋企前後買咗三隻，一隻我用，一隻我媽用，仲有一隻比我老爸操作不良用爛咗orz　另外我奶奶見電子燉盅咁方便，佢又買咗個可以同時燉兩小或者一大嘅電子燉盅，又係貪佢方便同唔駛睇火。所以呢，而家唔同以前，就算小家庭、屋企冇工人，只要有心，早一晚準備好哂材料，一樣可以煲湯煲補品比自己同埋家人。