舊博文．你想追求

此文曾記於Xanga．Tue, 15 Jan 2013

之前《搵樓雜談外轉》講過，住晌沙田市中心真係好易被寵壞。老公只係搬咗返馬鞍山兩日，就已經深深領會到沙田同馬鞍山全兩個世界！

首先，沙田市中心因為近火車站，所以就算係平日都係勁多人。食飯唔駛等位果日係好彩，食肆十點半last order但係舖頭仲坐咗超過一半人晌到都係好正常！但係馬鞍山市中心就完全係另一回事。除咗某幾間大型壽司、pizza同咖啡店之外，基本上唔駛等半個鐘就可以入座，講緊嘅係星期六日食飯時間而唔係平日！！另外，沙田市中心夜鬼多，好多舖頭就算收十點，但係商場內都仲係勁多人。但係馬鞍山市中心就差好遠喇，尋晚我同老公兩個人，食完飯八點半，某旋轉木馬商場嘅舖頭有1/3已經關門！另外果D就算未閂都冇乜人行，真係晌商場打橫行都仲得！對面有戲院商場就好DD，仲有少少人氣，不過同沙田市中心果種繁華都係冇得比！事實上，馬鞍山自成一閣，好少吸引到區外客；相反馬鞍山友本身仲會出返去沙田行街睇戲食飯，試問咁樣馬鞍山嘅人條又點會勁得過沙田吖！

不過馬鞍山市中心有樣好過沙田市中心，就係食飯一定平過沙田！沙田市中心食肆多，但係十間有八間都唔平，兩個人食晚飯，平極都要$150埋單。平過$150唔係冇，唔計美家活襪啄啄，談佬、暈貴香、得馨、圍壹麵渣、餘米渣、水王粥等等咪平囉，不過難搵位到你唔信！！Foodcourt高級少少果D hihi cafe、趺落嚟呀、壽司、B1、焦急三文治、OOO……等等等等，仲有連城廣場四樓美食坊，二人dinner平均$150-$300。新城市七樓，齋舖、豬扒小姐、阿JOHN越南料理、米pizza、泰國菜、大南角、仲有幾間日式料理……二人dinner平均$250-$300。相反，馬鞍山市中心冇乜豬扒小姐同日式料理呢類高級食肆，茶記同小炒舖就反而有十間八間，仲要梗有一間晌左近。如果日日都晌馬鞍山市中心食茶記，年中真係慳過晌沙田市中心搵食好多！！

如果講食同行街，可能真係沙田優勝過馬鞍山嘅。但係講到住，唔係講location，而係living style，真係馬鞍山好住過沙田，最少條街真係冇咁多人，唔駛成日同人「擦肩而過」，而且旋轉木馬商場後面就係馬鞍山公園同埋海濱長廊，真係連啖空氣都新鮮D！仲有，馬鞍山D樓新過沙田D樓好多，我哋而家住service apartment又大過以前住沙田市中心果D 3XX呎﹝實用面積﹞細單位，真係改善咗居住質素o架！！老公話，以前住3XX呎，入屋五步就行到盡頭，而家行廿步先行得完，重點係阿仔多咗地方走動，老公又可以「享用」1.5間房﹝佢霸埋個細房嚟打機﹞，就算食得差D，佢都唔介意啦！！

沙田同馬鞍山，大家都係新界東，馬鞍山仲打埋算盤都係沙田嘅一部分，但係一個熱鬧繁華節奏快紙水高，一個就相對旺中帶靜紙水低少少交通差少少。不過沙田市中心同馬鞍山市中心樓價講緊差成兩千蚊呎，一分錢一分貨，睇吓你想追求D乜嘢生活啦。我？呢一刻緊係錢最重要啦！沙田樓太貴喇，想住大D唯有揀馬鞍山啦，而且馬鞍山出沙田都好方便啫！