其實過去一年，樓市都係升！至於係因為辣招而壓抑升勢、定係大家口不對心仍然要追價入市，我呢個小師奶就真係唔識分析喇。不過好明顯就係，已上車嘅用家就唔係好想個市跌 (驚負資產嘛)，未上車嘅準買家就好想個市快D跌 (可以上車嘛)，至於花生友喇喎，就梗係鍾意睇人○○啦XD
但係，真係咁易跌？唔好講港島、唔好講九龍、唔好講大西北，我只講我住開嘅沙田馬鞍山，一個開發咗三十幾四十年嘅新市鎮，個個家庭都仔大女大要開支散業，買番附近方便照應係理所當然嘅事。另外沙田出名英中多，唔好話本區居民丫，外區居民都想入嚟分一杯羹啦 (有小朋友嘅家長就一定明白呢點)。再者，近年大學興起收大陸學生，大陸學生抽唔到宿舍住邊好？咪唯有租屋住，祈求可以住近DD學校，方便返學囉。住沙田，晌尖沙咀返Poly可以坐火車 (20分鐘內)；晌九龍塘返City或者BU可以坐火車 (15分鐘內)；晌馬料水返CU嘅除咗火車 (10分鐘內) 之外仲可以揀住馬鞍山坐巴士 (20分鐘內)。唔信？你試吓行落去沙田市中心或者馬鞍山地產舖搵租盤，或者行入去海X軒問吓，就知道有幾多係大學生合租喇。你話丫，有強大嘅大陸學生支持，樓市真係有機會跌？仲有最重要嘅一點，自住樓唔係睇短線，如果你睇過去10年、20年、甚至30年，樓市整體都係升！想當年老麥餐賣$16蚊，而家都賣$21啦！通漲在前，只要你死守到最後一刻，樓價點都會係升架！
總知，小師奶嘅心態就係，租樓等於幫人供樓，既然自己供得起，點解唔自己買樓而要幫人供？自己供咗，唔跌到變負資產，埋單都仲有幾舊磚頭可以換到錢；幫人供樓，就租樓三十年最後都得個吉。至於幾時先係入市好時機？我鬼知你荷包有幾多錢可以入市啫～
沒有留言:
張貼留言