service apartment 搵人頂，傻的嗎？

尋日上網見到呢個post，個腦即刻浮現出「傻的嗎？」呢三個字。先睇睇我見到D咩先……

淨係睇標題以為真係有荀嘢，點知一click內容，頂！海X軒！

大佬，乜換樓唔係計好時間先簽service apartment contract咩？點可能呢頭簽contract (一年約) 果頭就買到樓架？你係買得咁急，就咪鬼簽一年約啦，而家人哋又唔係唔可以簽半年約呀 (雖然平均月租係貴咗)。你係唔急買樓，就唔會張contract剛剛effective就放定租啦！

呢個樓主最露骨就係，搬字過紙搬人哋官網D圖同內容過嚟，仲夠膽死寫免佣靚，真係荒死冇人知佢想搵人執佢手尾。

不過呢個世界，有騙子嘅地方就必定有水魚，我見有三個人留言，其中一個問個盤晌邊，兩個就請樓主pm detail……真係希望唔好有水魚會落搭。

講真，自己walk-in入去搵一年租，最平最平都唔駛$14000，話就話包水唔包電，但係加埋utility fee，一個月都係$14000左右，仲可以有最多4張住客證 (不可轉名) 任坐shuttle同任用會所泳池，有哂保障，點解仲要幫人承接呢D二手service apartment contract？況且，你問過＋＊哥未先？

我老公仲話，放呢個盤果個其實都戇居嘅，自己簽嘅約，萬一二手租客 (記住係酒店唔承認嘅) 整爛嘢，到最後咪又係要自己賠錢！

私樓租約未完搵人頂我就聽過，但service apartment搵人頂，唔駛諗都知道唔得啦！點解？因為對手係＋＊哥囉！

嗱，聲明在先，我唔係話海X軒有咩問題，只不過我唔抵得呢個世界有咁stupid嘅人同事咋！