此文曾記於Xanga．Tue, 19 Feb 2013
尋日最爆嘅地產新聞，一定非某長☉拆售service apartment莫屬。先唔講呢個工廠區service apartment值唔值得買，淨係講＋＊哥揀啱日子夾好時間，呢邊樂富攪珠抽綠白表居屋，果邊長☉就比機會果D抽唔到居屋嘅人「上車」，就已經抵比個叻佢啦！呢個盤仲要標榜冇SSD、BSD，即係就算摸貨轉售都唔駛比多15%印花稅，咁又即刻吸引多一班投資者，叻叻！
講返service apartment，如果唔係自己而家住緊馬鞍山某service apartment，都唔知道原來住service apartment有好多你估到、又或估都估唔到嘅嘢。首先要講嘅就一定係水電煤。酒店係唔用煤氣嘅，熱水都一定係來自電熱水爐，因為用煤氣，要通過消防檢查係好麻煩嘅事。電就當然有亦當然要比錢啦，但係電費單就唔係電力公司寄比你，而係管理公司話你用咗幾多就比幾多，當然你係應該可以去睇錶嘅，不過比你睇完又點？水費呢，話就話唔駛比，但係其實管理公司每個月會收你一個叫utility management fee嘅嘢。UMF點計？Sorry唔知，亦唔會比你知，你只要乖乖比錢就得喇。
講完基本嘢，就講D複雜少少，亦都係我而家幾乎日日都要面對、而又好頭痛嘅嘢，就係——食！頭先都講咗，service apartment係冇煤氣嘅，但係service apartment又有個open kitchen喎，咁點煮飯食呢？答案就當然係用電啦！電飯煲煲飯、電水煲煲水就當然冇問題啦，但係電爐﹝我都唔肯定佢果個係普通heater定係電磁爐﹞煮麵炒菜就好有難度，因為個爐係廢嘅。點廢法？我用煤氣爐頭7分鐘就煮好一包餃子，但係用電爐就要10-15分鐘，因為佢最滾都只係「蝦眼水」。我已經同老公講，住apartment呢一年唔好expect我會煮D複雜嘢，最多都只係炆炆烚烚，因為呢度先天不足！另外比得個廢嘅爐你用就即係唔expect你日日煮飯，所以佢係冇抽油煙機嘅，連抽氣扇都唔一定夠家用抽氣扇嚟，因為使用手冊寫住「煮食時請打開窗戶」——雖則隻窗離開個open kitchen廿九幾呎遠。
Service apartment個廁所固然係黑廁啦﹝黑廁就即係個廁所一隻窗都冇，要抽氣就要用類似浴室寶嘅換風機﹞，咁黑廁亦即係冇地方比你晾衫。唔好諗住掛哂入廁所就得呀，冇太陽淨係靠果個抽風，一日都未必乾得到兩件衫呀！咁洗完衫點算？嗱，你可以自己買個活動晾衫架放晌窗邊晾衫嘅﹝不過咁樣就遮哂D景喇﹞，又或者去買個天☆野和風機﹝原理係焗乾D衫﹞，甚至學管理公司話，拎落樓下laundry囉，佢有24小時自助洗衣服務o架！！
講起洗衫，講少少題外話，佢個洗衣機廢到死！佢果個係薄機唔可以洗太多衫我明，但係兩公婆、兩日家居衫褲內衣加兩件返工上衣都洗唔郁！我真係好懷疑佢係咪set咗重量限制2公斤囉！
講到呢度，可能你會問，講到咁差你又住？答案係，租樓唔駛特別同業主錫住，佢話唔鑽牆我咪唔鑽牆囉、佢話上網只可以用某個位數字服務咪用囉、冇得裝雞寶咪唔睇囉……我係租客咋，我唔會對service apartment有太大要求，整花D傢俬亦唔會特別肉赤，電器壞咗又唔駛我比錢整，而且塞個廁所壞支光管仲可以24小時打落去維修部叫人嚟整﹝我真係試過﹞，你仲想點先？重點係，睇錢做人嘛！出面租私樓乜傢俬電器都唔包，而家service apartment咩基本傢電都包埋比你，真係搬屋都顧少一樣麻煩事呀！
住service apartment有好處亦都有唔好處，但係就冇乜手尾跟。屋企有咩壞打個電話落front desk同維修部就搞掂，完全唔駛擔心廁所廚房窗台漏水會比樓下投訴；住得唔滿意，租約期滿拍拍籮友就走人，乾手淨腳。至於你話買service apartment自住或者收租喎……你自己諗吓值唔值啦～
沒有留言:
張貼留言