其實呢個《搵樓雜談﹝二﹞》係發生晌《搵樓雜談﹝一﹞》之前，不過呢個係plan B，我冇諗過真係要拎出嚟用，但係就係因為呢個令老公充滿遐想嘅plan B，搞到我同老公睇咗六個租盤都睇唔啱。究竟plan B係乜？就係租service apartment！
馬鞍山有service apartment？可能唔係有好多人知，不過曾經住晌馬鞍山十年、次次行經某旋轉木馬私人屋苑都見到呢張poster嘅我，又點會唔知吖。Poster上某service apartment價錢真係好平，只係$8XXX，淨係睇價錢已經帶比人無限幻想！雖然，同一張poster我已經睇咗差唔多十年，不過晌呢個樓市貴到痴孖根嘅世代，就算明知poster呃人，你都會有0.01秒心動！另外，因為奶奶做過service apartment，所以我同老公都認為住service apartment就唔駛再做家務！呢個對於負責洗廁所嘅老公嚟講簡直就係天大嘅喜訊！！仲有最最最重要亦都係我哋嘅最大要求就係，service apartment一定會有基本傢俬電器，唔駛頭痕！就係因為咁，所以我就先做咗小小功課，打去問定價錢，再同老公去參觀下示範單位。
Service apartment係contract愈長就愈平，以我哋住一年咁先講，兩房無景觀細單位租金都係$15000左右一個月，其實真係同租出面私樓差唔多！唔怪得成日都聽人講話呢間service apartment D房好爆啦！原來比多少少錢就可以少D煩惱！！
不過原來service apartment係唔包清潔o架！！清潔係要另外比錢，不過都唔算好貴，幾百蚊一個月。老公話幾百蚊抵比啦，除返開都係幾十蚊個鐘。老公大人話佢時薪百幾蚊，所以冇理由要佢拖地洗廁所喎！！
另外，service apartment有簡單住戶設施，可以做gym游水，又有shuttle出沙田老尖同鑽石山，對於我嚟講就梗係方便啦，老公都話方便佢喎﹝一程車最少慳幾蚊o架﹞！唯一唔方便就係apartment樓下只得「幫李日日賺」同一間酒樓，同埋叫外賣要落大堂拎，要認真解決食呢個問題真係要花D功夫或者花D腳骨力行10分鐘﹝重點係冇瓦遮頭﹞去某大型私人屋苑先得。
睇完環境，老公就梗係滿意啦！鬼咩，佢話D錢唔係佢o架喎，比幾多錢租唔緊要，最緊要係佢唔駛洗廁所！！係呀，D錢唔係佢，不過係我o架嘛！！有呢個咁強大嘅final fantasy比老公揀，你話其他租盤佢又點會睇得上眼吖！
講到呢度，要準備打去service apartment hold房喇，因為真係好搶手o架！！
沒有留言:
張貼留言