原本想講好多廢話做開場白，諗諗吓都係唔講喇，直接去片睇吓政府今年2月23日搞多個DSD出嚟之後，D人究竟係咪仲咁天真啦！
原本有供有求冇問題，問題係，咩叫「只求市價」？業主賣樓原本就唔係按市價賣嘅咩？如果唔係急住換樓，就可以唔按市價吊高嚟賣？唔明唔明！
得果$30萬首期，又想間屋大、又想供得長供得少……其實出POST果個人思想應該仲停留晌2010年、$300萬唔駛就可以買到市中心屋苑三房﹝建築634'實用513'﹞果個年代。大佬呀，上網做吓功課就知道，而家借$270萬、25年、2.15%都要供差唔多$11700一個月，如果計埋加息0.25%後就幾乎供$12000，仲未計每個月比管理費、三個月比一次差餉地租……不過而家2013年，市中心大型屋苑細兩房冇景觀都要$350萬起跳，得揸$30萬首期連馬鞍山果堆錦字輩居屋細單位﹝建築515'實用401'﹞都未必買到呀！你話而家樓價唔係癲咗都真係冇人信！
問呢個問題果個人又係思想脫哂節！如果馬鞍山都冇$300萬樓，咁沙田又點會有$240萬樓呢？唔好話我舊年年尾市中心層單邊開揚樓賣咗$360萬丫，就算唔係市中心，去到對面河、甚至上到火炭老牌居屋、大圍深處美字屋苑、獅子山下花園，都未必搵得到平過$250萬屋仔啦！
問完$240萬之後仲有人夠膽問$200萬……雖然我知道一定有，不過而家樓市癲到咁，比你搵得到有$200萬樓，唔係上山下海隔涉到你唔信，就一定係細到連改做studio flat之後都放唔到一張床加一張梳化，又或者樓齡拍得住屋企高堂﹝再加送漏水維修問題一堆﹞……其實，真係咁有必要晌呢個時候買樓咩？
其實仲有D我搵唔返出嚟，不過問嚟問去都係果三幅被——樓價幾時會開始跌、跌幾多、跌唔跌得返2009年個價、而家好唔好賣樓……見到呢D POST，衰D講句，真係答都費事！我知道幾時跌、跌幾多，我就做咗＋＊哥啦！至於好唔好賣樓喎，幾百萬上落，你真係信一個三唔識七、吹水唔抹咀嘅網友？我就信自己多D囉！
有時睇吓呢D forum，就知道香港政府打壓樓市嘅成效有幾大，因為任何時候都總有一班既唔做功課、又不切實際嘅人想上車。另外同時又有一班早幾年入市嘅人，見到自住樓兩三年間升咗百幾萬，就想吐現等跌市。其實講到尾，如果唔係有能力、有需要，點解要揀呢個時候上車呢？又，如果唔係經濟有問題，點解要揀呢個時候賣樓吐現呢？我唔係好友、更加唔係淡友，我只係想講，機會係留比有準備、有實力嘅人，至於你有冇機會喇喎，我又唔係你肚裡面條蟲，我鬼知咩？
沒有留言:
張貼留言