經地產買賣樓宇有樣嘢唔好，就係佢一定有你record，不論你姓乜名乜住係邊一忽，只要撳個制，成公司所有同事都睇到！通知跟開我果個地產經紀賣樓果日，佢已經提過我話會幫我update我個status，之後可能會有D電話打嚟，點知……隔日、真係隔日，就有經紀打嚟問我會唔會再諗住入番市！唉，唔怪得D人話最好每次買賣就出張鬼卡，用完就掉，等D經紀騷擾唔到你，可惜我已經太遲喇！！
電話接得多，內容個個都咁上下，不過總有一兩個比較深刻D︰
阿☆太，我見你層樓賣咗喇喎，有冇諗住買返樓呀？
唔駛喇，唔該。
仲諗住介紹你賞月添。
真係唔駛咑，唔該。﹝收線﹞
賞月？做緊嘢忙緊，第一吓聽到真係以為佢講賞月……停低諗諗，原來係元朗最新果個窿窿盤尚○！而家D樓盤名真係呢……講起賞月，佢仲好似有講迎月o架，不過我諗佢應該想講迎○吧？﹝按︰原來真係有個盤叫○玥，就係「抬頭望見單車俓、花園兼做小食亭」果個大埔盤 orz by 7th Feb﹞
阿☆太，我見你層樓賣咗喇喎，有冇諗住入番市呀？
唔駛喇，唔該。
唔係喎，D錢放晌銀行會貶值，不如諗吓買個舖位收租丫，平平地都係三百幾萬就得，每個月有五厘回報……
我諗我冇興趣喇，唔該。﹝收線﹞
原來佢係sell緊啱啱推果個唔知老尖定荃灣商場，劏舖就梗係平啦，如果唔係切到細細件又點氹你班無知婦孺買？
阿☆太，我見你層樓賣咗喇喎，有冇諗住買返樓呀？
唔駛喇，唔該。
仲諗住介紹你天●添。
真係唔駛喇，唔該。﹝收線﹞
天●？咪就係將軍澳果個新盤囉！將軍澳呀！你叫個住開沙田嘅客買將軍澳？你有病無？
其實隔日就收到呢D電話真係好煩，尤其係晌公司忙緊果陣，真係好鬼有衝動爆佢！我諗唯有早D入番市，D地產經紀先唔會再打嚟orz
沒有留言:
張貼留言