終於等到成交，可以講返成個賣樓過程。
晌未講賣樓過程之前，首先講吓我點解要賣樓先。身邊有朋友問我係咪趁高價賣樓賺錢，又問我點解唔放租，驚唔驚賣咗買唔返……其實好好地一層樓，仲要沙田市中心，值錢又值租就梗係死揸唔放啦！但係如果層樓有返廿零三十年樓齡、落雨天窗台邊一定要放毛巾索水、落大雨要驚唔知邊度滲水搞到屋企跳灰士、最慘情係十號風球屋企窗台天花滴水滴到要搵個盆嚟裝水……咁你仲會唔會keep住呢層樓？
其實如果唔係舊年個十號波韋森特，我諗我都會繼續忍受用窗台邊放毛巾索水、同埋一年跳一次灰士呢兩樣嘢。可惜窗台天花滴水呢家嘢，你未經歷過，係估唔到住石屎樓都會好似住鐵皮屋咁慘。睇住D水一滴滴由天花滴入嚟、窗台又入哂水、屋企仲跳哂灰士冇電用……走又唔係唔走又唔係，果一刻唯一可以做嘅就係望天打卦，希望個風早D打完早D停雨……可能有人會問，窗台天花滴水喎，即係舊窗台石屎裂咗？搵管理處整唔得咩？答案係yes，窗台石屎裂咗，不過窗台石屎個業權都係屬於業主，所以要整都係業主出錢整。不過管理處都算好，隔咗三個月﹝？！﹞先搵人上嚟睇，再group埋所有相同問題單位﹝？！﹞搵人報價整，兼肯同業主share番一半維修費用。可惜個工程實在太大，要先拆窗搭棚、再搵嘢遮番成個窗台石屎﹝唔係倒石屎修補﹞，起碼要整一個星期……我一家三口晌度住緊，點樣比一個星期師傅做工程呀？
其實打完風之後已經講咗話等冬天就賣樓o架喇，點知等等吓，機會嚟喇……
前後四五個經紀打嚟問我條底線，個個都話我叫得貴，銀行網上估價估唔足、可唔可以減D……其實唔係我唔想減呀，只係exactly我樓下果個單位啱啱做咗個天價成交，我晌佢樓上冇理由賣得平過佢啫，於是上嚟睇樓嘅人唔多，前後只得三個客。
第一個客係兩個男人，上嚟係咁易睇咗唔夠十分鐘就走。可能男人都係鍾意靚嘢，見我間屋個view靚到「泵」一聲，可惜價錢貴，所以只係問咗幾句就走人。呢個客睇完樓之後兩個星期有call back，問可唔可以減D，可惜佢個價唔係我心目中個價，所以最後唔成事。
第二個客係一個師奶同一個女仔﹝應該係佢個女﹞。女人果然係細心D，師奶又更加係又細心又精明，一入屋就行埋窗台睇，一睇到有水漬就問上次十號風球係咪入哂水，又開門見山話想篤開我廁所個假天花睇吓有冇水漬……講到呢度就已經知道就算我層樓平十萬都未必成交到，何況我個叫價仲貴過銀行估價！
第三個客，亦都係新買家，我唔敢講太多，唯一可以講嘅就係「人總要比人呃一次」！！上嚟睇兩次樓，淨係睇景同望住個圖則諗住點間房，完全冇行埋去窗邊睇吓窗台！唔知係個買家心急上車丫定係佢個經紀friend心急做生意喇，七點半睇完樓，八點話想睇多次，問可唔可以而家上嚟……OK，點知睇咗都冇10分鐘，走咗10分鐘，個經紀就打嚟壓價。咁我都明壓價係必然，不過佢都壓得幾勁囉。我同個經紀講你知唔合我樓下做咗個天價成交丫，佢又話唔知，淨係話同個買家再傾傾。傾到十點幾十一點，佢竟然走上嚟送票！！嘩，真係急到佢呢……我同我老公事後都話，呢個經紀都真係夠哂老友，急住推個朋友去死﹝汗﹞，我個窗台D水漬真係大到行近DD都睇得到，都唔知佢係睇到扮睇唔到丫、定係真係唔識睇。不過算啦，我哋買呢層樓果陣咪又係睇到都唔知果撻原來就係水漬﹝唉﹞！所以呢，人真係總要蠢一次、比人搵一次笨，只係我哋笨咗兩年全身而退都仲有錢賺，而下手業主就唔知有冇咁好彩囉。
講起呢個「好朋友經紀」，我真係唔知係我見識少丫定係佢天真，我真係估唔到收錢放鎖匙當日，佢會打比我，問我層樓有D咩要注意！！其實佢同新業主連埋交吉前驗樓，前後都睇咗三次，佢真係睇唔到有水漬o架咩？如果真係睇唔到，咁我都幾懷疑佢嘅專業表現。但如果佢睇到，咁佢又仲乜問我要注意D乜呢？想當日我買樓都冇咁樣問我個經紀啦！唔通「好朋友經紀」見我個樣生得和藹可親，就諗住我一定會同佢講真話？不過側隱之心人皆有之，我既然搵咗你笨，做人唔好做到咁盡，我就「係咁易」話比佢知要注意窗台入水啦！佢聽到都唔知幾驚，不過我諗佢一定想像唔到呢個「入水」係點樣入水法囉……
呢次賣樓&搵地方搬真係學識好多嘢，最起碼學識咗買樓唔好買化妝樓，一定要睇吓窗台同廁所有冇漏水，同埋就算冇漏水，買二手樓，一定要預留大筆錢裝修整整隻窗同整整個廁所。而某華●樓同某長☉樓，免得過就最好唔好買，因為一個用料◇◇◆◆一個實用率□□■■。
沒有留言:
張貼留言