此文曾記於Xanga．Mon, 10 Dec 2012
做working mama真係難，為咗個仔將來返學都可以有人做backup照顧佢，唯有搬近D屋企人，由沙田搬入馬鞍山。
對於我呢個冇乜餘錢周轉嘅人嚟講，搬屋第一件事就梗係賣樓套現啦！賣樓呢part我哋搵個機會再講。咁賣樓之後就係搵樓。我同老公要求都唔算高，只係想搵間細房連傢俬同埋$10000左右嘅屋啫。可能呢兩年真係太多馬鞍山友開支散葉，所以租金都唔平，又搶手，居屋細兩房都去到$10000，仲要原本阿媽樓上有間放租嘅，放租兩三日就比人租咗，睇都冇機會睇！私樓仲誇，要$12000起跳！唉，都算，我都知我個理想價可能out out地，點知大部分睇嘅租盤都係唔連傢俬﹝其實我已經同地產講咗要連傢俬！點知佢都係帶我睇其他嘢！暈~﹞，有D連傢俬嘅但係D傢俬就好殘，我老公睇到都話其實係業主唔要又唔想清走，所以先留晌到比租客。
呢次睇樓經驗，真係唯有當比自己大開眼界啦！
咁究竟有幾大開眼界先？
第一間睇嘅樓係某居屋細兩房。未入屋之前地產經記都有講話，而家D租盤好緊張，呢個盤放咗出嚟一個星期都未租得出，唔知點解D睇樓客會睇唔啱。一上到去，開門，我哋就知點解喇。D牆紙飛哂出嚟嘅！！大佬呀，有心出租就執一執個牆身啦！業主大佬你唔係諗住叫個租客幫你執吓話？！除咗牆紙之外，間屋個露台有成吋深嘅水晌到唔退！！媽呀，我知呢幾個星期日日都落雨，但係個露台有閂窗，咁水從何來呢？唉，睇到呢度仲唔嗱嗱聲走人咩？
第二間係某居屋細兩房，但係業主將兩房改做一房。呢個盤有床架有梳化有入牆度尺櫃，原本都合心水，不過location真係唔係好得！行去巴士站唔係上樓梯行10分鐘就係落樓睇行10分鐘，行去同屋苑商場都要5分鐘以上，對於住慣沙田市中心，乜都手到拿來嘅老公梗係say no啦！不過呢個盤真係好旺場，我哋睇之前有一個客睇緊，睇完之後又有一個客上嚟睇！半個鐘有最少三個客，勁！
第三間係某大型私人屋苑大兩房。點解話係大兩房呢？因為呢個屋苑有好多個則，兩房則都有分四百零幾平方呎到四百九十幾平方呎不等。可能我已經有買樓經驗，知道呢D兩房則個廳都唔慌大，果然一開門睇，BINGO！同我屋企間返兩房之後一樣咁細！！睡房個窗台仲要同我屋企果個有得fight﹝大而無用﹞！！都算，其實租樓我都唔介意佢個廳大定細o架喇，不過業主話會搬走張床！Oh no！我就係唔想搬走我而家張床同櫃，所以先搵連傢俬之嘛！！唉，即係又唔駛諗。
第四間都係某大型私人屋苑，另外一隻兩房則。呢間仲有個賣點，就係海景！！嘩，我真係冇諗過某大型私人屋苑唔算近海皮，前面仲有另一個旋轉木馬私人屋苑，佢竟然可以高過哂前面而睇到海囉！！不過可惜吖，吉屋一間，所以又唔駛諗。如果係三房我諗我會考慮買嘅XDDDDDD
第五間係另一個私人屋苑兩房單位。講真，睇到呢個盤我已經冇乜心情睇落去，因為好多盤都唔連傢俬，要我搬我而家瞓緊果張床過去，一來麻煩，二來又唔知啱唔啱size﹝我張床度呎做嘅﹞。不過本住「睇租盤當做定買樓功課」嘅心態去睇，又係另一番感覺﹝反正睇樓又唔駛比錢﹞。呢個盤同對上果個都係一樣，吉屋。仲有，佢話1X樓，但係睇落好矮，同條馬路好接近，所以都唔駛考慮，買都仲要諗諗。
最後一間係某私人屋苑兩房單位，有shuttle出九龍嘅。呢個盤同我個budget差幾千蚊，不過因為超近屋企人，地產經記又話一定有傢俬，所以先去睇。呢個盤裝修都算係咁，不過老公就嫌佢有D舊。其實佢最致命嘅地方係太矮，望住club house之餘仲要望得都幾清楚！！老公話感覺太侷促，同埋咁樣﹝望到club house﹞唔可以晌屋企唔著衫喎@@
今次睇樓真係學到好多嘢！因為雖然住晌馬鞍山多年，又上地產網睇過D圖則，但係都唔及親身上去睇一次咁真實！未睇樓之前我都諗過買某大型私人屋苑三房或者某shuttle私人屋苑兩房，但係睇完樓，老公話如果下次再買，一定會揀某大型私人屋苑，原因係某大型私人屋苑嚟緊開兜巴星喎﹝當年佢就係因為兜巴星而唔肯住馬鞍山﹞！！另外老公話，原本對某shuttle私人屋苑好有fantasy，而家睇完就冇哂fantasy，就係因為望住個club house！！其實我諗有D景應該會幾開揚o架，不過我哋冇錢買之嘛！！
好喇，自住樓又賣咗，睇租盤睇咗六間都睇唔啱，咁點算呢？我同老公當然有後著啦﹝仲要係佢恨咗好耐添﹞！下次再講！
沒有留言:
張貼留言